Fótbolti

UEFA rannsakar kynþáttaníð í garð finnsks landsliðsmanns

Valur Páll Eiríksson skrifar
Glen Kamara tilkynnti um kynþáttaníð leikmanns Svartfjallalands.
Glen Kamara tilkynnti um kynþáttaníð leikmanns Svartfjallalands. John Berry/Getty Images

Knattspyrnusamband Evrópu, UEFA, rannsakar meint kynþáttaníð leikmanns Svartfjallalands í garð Glen Kamara, landsliðsmanns Finnlands í leik liðanna í Þjóðadeild Evrópu í gær.

Leikur gærkvöldsins var skrautlegur þar sem hann fór fram í gríðarmikilli bleytu og rigningu í Podgorica í Svartfjallalandi. Leikmann Svartfjallalands virðast hafa mætt blóðheitir til leiks og fengu að líta fimm gul spjöld á fyrstu 19 mínútum leiksins, þar af fékk Zarko Tomasevic að líta tvö og var vísað í sturtu eftir um stundarfjórðung.

Það virðist ekki hafa verið einu brot þeirra svartfellsku í leiknum þar sem Glen Kamara, hörunddökkur miðjumaður finnska landsliðsins og Rangers í Skotlandi, kveðst hafa orðið fyrir kynþáttaníði af hálfu ónefnds leikmanns andstæðingsins.

Finnska knattspyrnusambandið hefur staðfest að UEFA sé með málið til skoðunar.

Kamara varð fyrir kynþáttaníði frá Tékkanum Ondrej Kudela í leik Rangers og Slaviu Prag í mars í fyrra. Kudela hefur alfarið hafnað þeim ásökunum en var dæmdur í tíu leikja bann af UEFA fyrir rasíska hegðun.

Finnland vann leik gærdagsins 2-0 og hafnaði í öðru sæti riðils liðanna í B-deild Þjóðadeildarinnar. Bosnía vann riðilinn með 11 stig og fer upp í A-deild en Svartfjallaland og Rúmenía luku bæði keppni með sjö stig. Rúmenía var með lakari markatölu og fellur í C-deild.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.