Íslenski boltinn

Tekst Fram eða Kefla­vík að komast upp í efri hlutann?

Runólfur Trausti Þórhallsson skrifar
Fram fær Keflavík í heimsókn í dag.
Fram fær Keflavík í heimsókn í dag. Vísir/Diego

Lokaumferð hefðbundinnar deildarkeppni í Bestu deild karla í fótbolta fer fram í dag. Eftir umferð dagsins verður deildinni skipt upp og leikið um Íslandsmeistaratitilinn annars vegar og hvaða lið falla hins vegar. Töluverð spenna er fyrir umferðinni sem verður flautuð á klukkan 14.00.

Segja má að helsta spennan sé í Úlfarsárdal þar sem Fram tekur á móti Keflavík. Staðan þar er nokkuð einföld, liðið sem vinnur á möguleika á að enda í efri hluta deildarinnar og geta þannig haft áhrif á hvaða lið verður Íslandsmeistari. Liðið sem tapar verður í neðri hlutanum og hefur tæknilega séð ekki að það miklu að keppa þar sem það eru litlar líkur á að liðið sogist niður í fallbaráttuna.

Fari svo að Stjarnan, sem er í frjálsu falli eftir fimm tapleiki í röð, vinni FH þá skiptir engu máli hvernig leikur Fram og Keflavíkur fer. Miðað við gengi bæði Stjörnunnar og FH að undanförnu þá eru heimamenn ekki líklegir til árangurs en liðið vann síðast leik þann 7. ágúst þegar topplið Breiðabliks lá í valnum.

Toppliðið fær ÍBV í heimsókn en Blikar hafa hikstað að undanförnu og tapað tveimur af síðustu þremur leikjum í öllum keppnum. Misstigi liðið sig hér þá gefur það bæði KA og Víking aukna trú í baráttunni um Íslandsmeistaratitilinn. Með sigri fara Blikar upp í 51 stig og tryggja sér þar með að lágmarki sex stiga forystu áður en úrslitakeppnin hefst.

Víkingur tekur á móti KR á heimavelli hamingjunnar í Fossvogi á meðan Valur fær KA í heimsókn.

Á Akranesi er svo sannkallaður sex stiga leikur þar sem botnlið ÍA fær Leikni Reykjavík í heimsókn. ÍA fer upp fyrir Leikni með sigri en gestirnir úr Breiðholti gætu sent FH-inga niður í fallsæti með sigri, það er ef FH tapar gegn Stjörnunni.

Það má reikna með gríðarlega spennandi umferð sem hefst eins og áður sagði klukkan 14.00. Stúkan verður með svokallað „Red Zone“ þar sem fylgst verður með öllu sem gerist í leikjum dagsins í beinni á Stöð 2 Sport. 

Leikur Fram og Keflavíkur verður svo í beinni á Sport 2 á meðan leikur Vals og KA verður á Sport 4. Öll umferðin verður svo gerð upp klukkan 20.00 þegar Stúkan verður á dagskrá Stöðvar 2 Sport.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.