Eftir fjögur ár er húsið ekki tilbúið og gluggatjón upp á þrjátíu milljónir

Um er að ræða hjónin Sólveigu Ragnheiði Gunnarsdóttur og Karl Stephen Stock annars vegar og Emilíu C. Gylfadóttur og Róbert Kristjánsson hins vegar.

Til að bæta gráu ofan á svart gekk hreinlega allt á afturfótunum til að byrja með í verkefninu. Eftir að húsið var rifið varð að brjóta niður klöpp áður en hægt væri að reisa grunn hússins.

Fjallað er um verkefnið í þættinum Gulli Byggir á Stöð 2. Gulli hefur fylgt hjónunum eftir í fjögur ár. Enn sér ekki fyrir endann á parhúsinu þó að fjölskyldurnar séu fluttar inn. Karl Stephen lýsti því í þætti gærkvöldsins hvernig hann hefði gjörsamlega keyrt sig út. Hann var allt ferlið í fullri vinnu, í háskólanámi og að vinna í húsinu. Hann lenti svo á vegg í febrúar í fyrra. Álagið var alltof mikið.

Emilía var orðin fullviss um að lóðin væri bölvuð og endaði á því að fá miðil á staðinn. Sú sagði að það væru álfar í klettinum sem væru ekki sáttir við framkvæmdirnar. Það væri ástæðan fyrir því að allt gengi á afturfótunum.

Emilía var tilbúin að reyna allt. Hún gaf álfunum brauð og hunang til að friða álfana. Þau Ragnar hlógu gríðarlega mikið af því í þættinum í gærkvöldi.

Héldu að þetta yrði bara græjað

En ástæðan fyrir því að ekki hefur enn verið hægt að klæða húsið eru gluggarnir. Eftir mikla framkvæmd við að koma þeim fyrir kom á daginn, við fyrstu rigningu, að þeir láku. Allir sem einn. Eftir skoðun kom í ljós að þeir standast ekki kröfur sem íslensk veðurfar gerir.

Gluggarnir voru mjög dýrir, sérpantaðir erlendis frá. Nú standa yfir málaferli við söluaðilann þar sem pörin krefjast skaðabóta og að gert sé við gluggana svo þeir standist kröfur.

„Þetta er tveggja ára mál og við töldum að þetta yrði bara lagað fyrir okkur af söluaðilum en svo kemur í ljós að það er ekki svo einfalt. Þetta var ekki aðeins frágangsmál heldur eru gluggarnir líka aðeins gallaðir,“ segir Sólveig Ragnheiður og heldur áfram.

„Bara viðgerð og kaup á gluggum fyrir bæði húsin til að koma því í rétt stand kostar yfir 16 milljónir. Það er án alls afleidds kostnaðar sem við höfum þurft að fara í; Að fá aðra iðnaðarmenn, lögmenn og matsskýrslu. Það er komið upp í þrjátíu milljóna tjón. Þetta er að lenda á okkur en ef þetta endar fyrir dómstólum þá erum við að vonast til að fá þetta til baka til þess að geta gert viðeigandi viðgerðir.“