Ólafur Davíð: „Virkuðum hræddir framan af þessum leik"

„Þetta eru vonbrigði ég verð að viðurkenna það. Við eyddum hér heilum hálfleik, þeim fyrri, í að gera bara ekki neitt. Fyrri hálfleikurinn situr í mér en við vorum vissulega mun betri í þeim seinni og hefðum getað komist yfir,“ sagði Ólafur Davíð svekktur þegar Gunnlaugur Jónsson ræddi við hann á Stöð 2 Sport að leik loknum. 

Valur hafði leikið sex deildarleiki eftir endurkomu Ólafs Davíðs fyrir þennan leik, haft betur í þremur þeirra og gert þrjú jafntefli. 

„Mér fannst eins og við værum hræddir framan af leik, þorðum ekki að fá boltann og vorum komnir allt of aftarlega á völlinn. Frederik Schram hélt okkur inni í leiknum og hann er klárlega einn af bestu markvörðum Íslands,“ sagði þjálfarinn brunaþungur um frammistöðu sinna manna.

„Ég held að það sé ekkert sem getur komið í veg fyrir að Blikar verði Íslandsmeistarar. Þeir hafa verið besta lið landsins síðustu þrjú ár en ekki enn tekist að landa Íslandsmeistaratitlinum. Ef þeir gera það ekki núna held ég að þeir geri það bara aldrei aftur,“ sagði hann um stöðu mála í toppbaráttu deildarinnar.

Breiðablik er með 47 stig og hefur 11 stiga forskot á KA og 12 stiga forystu á Víking eftir úrslit 20. umferðarinnar. Valur situr svo í fjórða sæti með 32 stig.