Enski boltinn

Klopp: „Fengum stig úr virkilega slökum leik“

Valur Páll Eiríksson skrifar
Klopp var óánægður með sína menn.
Klopp var óánægður með sína menn. John Powell/Liverpool FC via Getty Images

Jürgen Klopp, þjálfari Liverpool, var að vonum óánægður eftir 2-2 jafntefli liðs hans við nýliða Fulham í fyrstu umferð ensku úrvalsdeildarinnar í fótbolta í dag. Hann segir sína menn einfaldlega ekki hafa mætt til leiks.

Liverpool lenti tvisvar undir gegn Fulham er liðin mættust á Craven Cottage í hádeginu. Liðið kom þó tvisvar til baka með mörkum Darwin Nunez og Mohamed Salah.

Liverpool-liðið var nokkuð ólíkt sjálfu sér þar sem virtist vanta ákefð í liðið gegn Fulham-liði sem mætti því af fullum krafti og gaf ekkert eftir. Klopp segir sitt lið hafa verið slakt í dag.

„Við fengum stig úr virkilega slökum leik af hálfu míns liðs. Hugarfarið var ekki rétt frá upphafi. Við áttum ekkert meira skilið,“ sagði Klopp og bætti við:

„Það er þörf á bættri frammistöðu. Við gerðum öfugt við það sem við ætluðum okkur. Úrslitin snerust ekkert um dómarann,“

Klopp fær töluverðan tíma á æfingasvæðinu til að rétta hlutina af hjá sínum mönnum. Liðið á mánudagsleik næstu helgi og hefur hann því rúma viku til að vinna í spilamennsku liðsins.

Liverpool mætir Crystal Palace á Anfield á mánudaginn kemur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.