Segjast ekki hafa klippt gamla þætti á ný

Umræðan um málið byrjaði í þessum mánuði þegar áhorfendur hófu að horfa á þættina upp á nýtt eftir að hafa horft á seinni hluta fjórðu seríu sem kom út 1. júlí síðastliðinn. Þá virtist einu atriði hafa verið breytt.

Atriði í fyrsta þætti fyrstu þáttaraðar þar sem Jonathan Byers tekur myndir af Nancy Wheeler án hennar vitneskju virtist vera breytt. Í því sem áhorfendur töldu vera nýrri útgáfu, leit Jonathan út fyrir að vera „minna perralegur“ eins og einhverjir orðuðu það. Þau byrjuðu síðar saman í þáttunum og því héldu einhverjir að atriðinu hafi verið breytt til þess að láta sambandið passa betur inn í söguna. 

Eftir þetta kepptust áhorfendur við að segja frá atriðum þáttanna sem þeir töldu hafa verið öðruvísi þegar þættirnir komu fyrst út.

Í færslu á Twitter-síðu höfunda Stranger Things kemur fram að þeir hafi aldrei og muni aldrei breyta atriðum þáttanna. Við færsluna hengja þeir klippu af Dustin að sverja upp á líf móður sinnar.