Fótbolti

Alexander Már heldur áfram að skora fyrir Þór

Hjörvar Ólafsson skrifar
Ion Perelló Machi hefur komið sterkur inn í Þórsliðið. 
Ion Perelló Machi hefur komið sterkur inn í Þórsliðið.  Mynd/Þór

Alexander Már Þorláksson skoraði tvö marka Þórs þegar liðið fékk KV í heimsókn á Salt pay-völlinn í botnbaráttuslag liðanna í 10. umferð Lengjudeildar karla í fótbolta í kvöld.  

Lokatölur í leiknum urðu 3-1 Þór í vil en Harley Willard sem lagði  upp seinna mark Alexanders Más skoraði þriðja mark Þórs. Björn Axel Guðjónsson klóraði svo í bakkann fyrir gestina úr Vesturbænum.

Norðanmenn eru með 11 stig í níunda sæti deildarinnar eftir þennan sigur. KV er hins vegar í næstneðsta sæti með sjö stig. 

Alexander Már gekk til liðs við Þór frá Fram um mánaðamótin síðastliðin. Hann hefur nú skorað þrjú mörk í fyrstu tveimur leikjum sínum fyrir Þórsara. 

Vestri gerði svo góða ferð á Selfoss þar sem liðið náði í þrjú stig með því að leggja heimamenn að velli með einu marki gegn engu. 

Það var Ongun Yaldir sem skoraði sigurmark Vestramanna í uppbótartíma fyrri hálfleiks. Yaldir var svo áminntur með gulu spjaldi í annað skipti og þar af leiðandi vísað af velli með rauðu spjaldi í upphafi síðari hálfleiks. 

Selfoss náði ekki að nýta sér liðsmuninn og sigur Vestra staðreynd. Chris Jastrzembski fór sömu leið og Yaldir í uppbótartíma seinni hálfleiks.  

Vestri hefur nú 15 stig í fimmta sæti en liðið er tveimur stigum á eftir Selfossi sem var á toppnum fyrir umferðina.  

Upplýsingar um úrslit, markaskorara og atburði í leikjunum eru fengnar frá fotbolta.net. 




Fleiri fréttir

Sjá meira


×