Innlent

Vestfirðingar treysta á ekkert lúsmý í sumar

Magnús Hlynur Hreiðarsson skrifar
Sigríður Ó. Kristjánsdóttir, framkvæmdastjóri Vestfjarðarstofu, sem fagnar því að ekkert lúsmý sé á Vestfjörðum og að veðurfræðingar hafi lofað besta veðrinu í sumar á Íslandi í landshlutanum.
Sigríður Ó. Kristjánsdóttir, framkvæmdastjóri Vestfjarðarstofu, sem fagnar því að ekkert lúsmý sé á Vestfjörðum og að veðurfræðingar hafi lofað besta veðrinu í sumar á Íslandi í landshlutanum. Magnús Hlynur Hreiðarsson

Það er meira en brjálað að gera hjá starfsfólki Vestfjarðarstofu að skipuleggja sumarið fyrir ferðamenn og aðstoða þá á ýmsan hátt, enda búist við metári í fjölda ferðamanna á svæðinu í sumar. Stofan vinnur líka að fjölbreyttum verkefnum í tengslum við byggðaþróun sem og atvinnuþróun á Vestfjörðum.

„Okkur var gefið upp af veðurfræðingum að hér yrði góða veðrið í sumar, þannig að við gerum bara ráð fyrir því að Íslendingar komi líka á svæðið með erlendum ferðamönnunum, t.d. til að flýja lúsmýið en hér er ekkert lúsmý. Þannig að hér verður bara margt um manninn og mikið um að vera í sumar,“ segir Sigríður Ó. Kristjánsdóttir, framkvæmdastjóri Vestfjarðarstofu.

Sigríður á von á um 150 skemmtiferðaskipum bara á Ísafjörð í sumar og 20 skip koma í Vesturbyggð. Hún segir að þetta sé algjört met í komu skemmtiferðaskipa á þessa staði.

En eru Vestfirðingar tilbúnir til að taka á móti öllum þessum ferðamönnum?

„Já, já, það er seigla í okkur Vestfirðingum, þannig að við höldum bara áfram og girðum okkur í brók eins og menn segja og búum til þær vörur og þjónustu, sem til þarf til að taka á móti gestum eins vel og við getum,“ segir Sigríður enn fremur.

Það eru margir flottir veitingastaðir á Ísafirði, m.a. Tjöruhúsið þar sem boðið er upp á gómsætan fisk með fjölbreyttu meðlæti. Þar er alltaf troðfullt af fólki og mikil stemming.

„Við erum með saltfisk, þorsk, lúðu, ufsa, steinbít og kola. Svo erum við með smá plokkara og svo eru gellurnar alltaf mjög vinsælar hjá okkur,“ segir Arnaldur Grímsson Bacman hjá Tjöruhúsinu.

En hvað segja erlendu ferðamennirnir, eru þeir ekki ánægðir með fiskinn?

„Þeir eru trylltir í þetta. Sumir eru að koma í sérferðir frá Bandaríkjunum og öllum heimshlutum að kíkja á okkur,“ segir Andri Fannar Sóleyjarson hjá Tjöruhúsinu og skellihlær.

Það eru margir flottir veitingastaðir á Ísafirði, m.a. Tjöruhúsið en þar er eingöngu boðið upp á fiskrétti að hætti hússins.Magnús Hlynur Hreiðarsson

Útsýnispallurinn opnaður 1. júlí

Það er ekki langt að renna frá Ísafirði til Bolungarvíkur en þar er heilmikil uppbygging og mikið að gerast.

Mesta spennan er þó fyrir útsýnispallinum á Bolafjalli, sem verður opnaður formlega 1. júlí.

„Það er náttúrulega útsýnið á dögum eins og þessum, þá er útsýnið stórkostlegt. Svo bara að vera staddur í þessari hæð, fá svona smá kítl í magann við að horfa niður og horfa á fuglana fljúga nokkur hundruð metrum fyrir neðan sig, það er bara eitthvað við þetta. Pallurinn er í kringum 60 metrar eftir fjallsbrúninni og við erum í 630 metra hæð,“ segir Jón Páll Hreinsson, bæjarstjóri í Bolungarvík.

Jón Páll Hreinsson, bæjarstjóri í Bolungarvík staddur á nýja útsýnispallinum á Bolafjalli, sem verður opnaður formlega 1. júlí.Magnús Hlynur Hreiðarsson

Í Bolungarvík er líka mjög merkilegt hús, Einarshús, sem er gistiheimili og veitingastaður, nefnt eftir Einari Guðfinnssyni, sem bjó í húsinu í 35 ára og rak þar meðal annars verslun.

„Við erum með sögu hússins upp á veggjum alveg frá því að Pétur Oddsson byggði húsið 1902 og hans fjölskylda, sem bjó hérna, sem hann missti, nánast öll börnin sín og tengdabörn í spænsku veikinni og berklum og þegar hann flutti út keypti Einar húsið,“ segir Arnar Bjarni Stefánsson, eigandi Einarshúss í Bolungarvík.

Útinám í skógi

Þá bregðum við okkur aftur á Ísafjörð og hittum æskuna á staðnum, börnin í leikskólanum Tanga, sem eru mikið í útinámi í skóginum við bæinn og finnst það skemmtilegasta sem þau gera í leikskólanum.

„Hér erum við bara í okkar vikulega útinámi með ævintýri og reyna á líkamann í skemmtilegum aðstæðum og leika. Þau eru bara að sækja í allt, skoða skóginn, klifra, fylgjast með hvernig náttúran lifnar við til dæmis eftir veturinn. Við erum að búa til skýli og njóta sín,“ segir Jóna Lind Kristjánsdóttir, deildarstjóri á leikskólanum Tanga.

Þó að 17. júní sé liðinn þá verðum við að heyra krakkana í lokin syngja aðeins fyrir okkur Hæ, hó, jibbí, jei og jibbí, jei en það lag kunna þau mjög vel.

Leikskólabörnin á Ísafirði, sem eru dugleg í útinámi í skóginum fyrir ofan bæinn og þá taka þau oft lagið í skóginum.Magnús Hlynur Hreiðarsson


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.