Þjálfari egypska landsliðsins rekinn eftir aðeins þrjá leiki

Galal tók við af Carlos Queiroz í apríl á þessu ári eftir að Queiroz var látinn taka poka sinn þegar liðinu mistókst að vinna sér inn sæti á HM í Katar.

Undir stjórn Galal lék egypska liðið þrjá leiki, tvo í undankeppni Afríkumótsins og einn vináttulandsleik. Egyptar unnu fyrsta leikinn gegn á heimavelli gegn Gíneu fyrir tæpum tveimur vikum, en töpuðu svo óvænt fjórum dögum síðar gegn Eþíópíu, 2-0.

Þriðji leikur liðsins var svo vináttulandsleikur gegn Suður-Kóreu síðastliðinn þriðjudag þar sem liðið tapaði 4-1.

Þessi tvö töp reyndust nóg til að fylla mælinn hjá egypska knattspyrnusambandinu og Ehab Galal var látinn fara. Hazem Emam, stjórnarmeðlimur í egypska knattspyrnusambandinu, segir að sambandið muni leita út fyrir landsteinana að eftirmanni Galal.