Innlent

Vilja að for­eldrar fái greitt fyrir að vera heima með börnin

Hallgerður Kolbrún E. Jónsdóttir skrifar
Hulda er ein þeirra foreldra sem vill fá möguleika á að vera lengur heima með börnin eftir fæðingarorlof.
Hulda er ein þeirra foreldra sem vill fá möguleika á að vera lengur heima með börnin eftir fæðingarorlof. Bylgjan

Leikskólamál hafa verið til mikillar umræðu að undanförnu í aðdraganda sveitarstjórnarkosninga, sem fara fram eftir rúma viku. Flestir flokkar í Reykjavík hafa til að mynda lagt áherslu á það að hægt verði að bjóða tólf mánaða gömlum börnum leikskólapláss, sem fæst sveitarfélög á landinu gera í dag.

Hulda Margrét Brynjarsdóttir skrifaði í dag grein sem birtist á Vísi þar sem hún kallar eftir því að foreldrar, sem það vilja, fái greitt fyrir að vera með börnin sín heima en ekki á leikskóla. Hulda og maðurinn hennar fluttu til Noregs stuttu eftir að yngri dóttir þeirra fæddist í það sem hún segir barnvænna samfélag. 

Í byrjun árs 2021 stofnuðu þau og fleiri svipað þenkjandi foreldrar samtökin Fyrstu fimm. 

„Það sem við köllum eftir í Fyrstu fimm er að foreldrar hafi val. Það fór svo þegar við eignuðumst seinni dóttur okkar að þá fluttum við til Noregs og sáum tækifæri til að vera lengur heima með barnið af því að frá tólf til tuttugu og fjögurra mánaða þá er greiddur styrkur heim,“ segir Hulda sem ræddi málið í Reykjavík síðdegis á Bylgjunni. 

„Þessi styrkur var enginn 35 þúsund kall eins og til dæmis Hvalfjarðarsveit er með í heimgreiðslur heldur voru þetta góðar 100 þúsund krónur íslenskar og við gátum bæði unnið með,“ segir Hulda. 

Þúsundir foreldra vilji möguleikann á að vera heima með börnin

Hún segir að þrátt fyrir styrkinn var heimild fyrir því að annað foreldrið ynni fullt starf og hitt væri í hlutastarfi. Hann hafi ekki verið bundinn við það að annað foreldrið væri atvinnulaust. Hún segir að þau séu ekki ein á báti í þessari nálgun á foreldrahlutverkið. 

„Við erum komin með rúmlega tvö þúsund í Fyrstu fimm hópinn á Facebook og þar er fólk á sömu blaðsíðu. Þar eru foreldrar sem kalla eftir því að geta valið um hvað þau vilja gera eftir að börnin eru tólf mánaða og fæðingarorlofi lýkur.“

Hún segir markmið samtakanna í grunninn að hlúa að málefnum fjölskyldna með börn upp í fimm ára aldur. 

„Við viljum að þeim sé gert sérstaklega hátt undir höfði, þetta eru ein mikilvægustu ár í mótun barna, mótun þeirra fram að fullorðinsárum,“ segir Hulda. 

Segir lausnir stjórnvalda til þess eins að koma foreldrum aftur á vinnumarkað

Hún segir gríðarlega mikilvægt að tryggja góða tengslamyndun milli foreldra og barna þeirra fyrstu árin. Þau vilji því tryggja að fólk geti unnið að þessari tengslamyndun með því að vera lengur heima með börnunum. 

Yfirskrift greinarinnar sem Hulda skrifaði á Vísi er „Fals­lausnir fyrir tann­hjól at­vinnu­lífsins sem bitna á börnunum okkar.“ Hún skrifar í greininni að það sé fásinna að halda að ungbarnaleikskólar séu lausnin, þeir séu aðeins til þess gerðir að koma foreldrum aftur út á vinnumarkaðinn. 

„Við höfum lengi staðið fyrir því að konur komist aftur á atvinnumarkað og Fyrstu fimm er mjög umhugað um réttindi foreldra líka, að við fáum að komast aftur út á atvinnumarkað ef við viljum en nú erum við komin þangað og nú þurfum við aðeins að bakka fyrir þá foreldra sem vilja vera heima,“ segir Hulda. 

„Eins og ég segi þá gátum við ekki séð okkur fært að vera hérna heima og lifað því lífi sem við vildum lifa þó við værum að lifa mínímaliskum lífstíl fyrir þannig að við fluttum erlendis til þess að fá þann stuðning.“

Hún segir þennan möguleika, að foreldrar fái greitt fyrir að vera heima með börnin, liður í því að stuðla að barnvænna samfélagi. Og samfélagi þar sem hraðinn er ekki jafn mikill. 

„Það er mikið stress að eignast barn á Íslandi. Það er hár standard, hraður lífstíll og við erum bara öðru vísi en þjóðirnar í kring,“ segir Hulda. 

„Í Noregi tókum við eftir því að fólk lifir fyrir fríin sín og fólk er ekkert að hafa börnin sín lengur á leikskóla að óþörfu, sex sjö tímar eru bara góður tími og bara mjög venjulegt að við værum ekki með börnin á leikskóla.“


Tengdar fréttir

Gjaldfrjáls leikskóli er réttlætismál

Í dag eru leikskólar orðnir að menntastofnunum þar sem ríkar kröfur eru gerðar til umönnunar og menntunar barna fram að grunnskóla. Um leið er krafist fimm ára háskólamenntunar leikskólakennara sem hafa jafnframt réttindi til að kenna í grunn- og framhaldsskólum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.