Innlent

Fleiri kosið utan kjör­fundar í Reykja­vík en fyrir sveitar­stjórnar­kosningar 2018

Hallgerður Kolbrún E. Jónsdóttir og Heimir Már Pétursson skrifa
Utankjörfundaratkvæðagreiðsla á höfuðborgarsvæðinu fyrir sveitarstjórnarkosningar fer fram í verslunarmiðstöðinni Holtagörðum. 
Utankjörfundaratkvæðagreiðsla á höfuðborgarsvæðinu fyrir sveitarstjórnarkosningar fer fram í verslunarmiðstöðinni Holtagörðum.  Vísir/Vilhelm

Fleiri hafa kosið utan kjörfundar í Reykjavík nú en fyrir sveitarstjórnarkosningarnar 2018, þótt tíminn til að kjósa utan kjörfundar sé mun styttri nú en þá.

Ástæðan er sú að ný kosningalög kveða á um að öll framboð séu komin fram þegar utankjörfundaratkvæðagreiðsla hefst en þannig var það ekki áður. 

„Það sem af er degi hafa 421 kosið hjá okkur hjá Sýslumanninum á höfuðborgarsvæðinu og frá því við opnuðum eru 2800 búnir að kjósa og á landinu öllu eru 4063, sem hafa kosið frá opnun,“ sagði Sigríður Kristinsdóttir sýslumaður á höfuðborgarsvæðinu í kvöldfréttum Stöðvar 2. 

Fleiri hafa nú kosið á höfuðborgarsvæðinu einu en á sama tíma á landinu öllu árið 2018. 

„Já, 2018 voru 2163 sem höfðu kosið,“ segir hún. Hún segir meiri utankjörfundaratkvæðagreiðslu í Alþingiskosningum en í sveitarstjórnarkosningum. 

„Sveitarstjórnarkosningarnar eru öðruvísi, þær eru nær samfélaginu, þannig að fólk vill kannski mæta á kjörstað á kjördag.“ 

Opið verður alla daga vikunnar fyrir utankjörfundaratkvæðagreiðslu á höfuðborgarsvæðinu í verslunarmiðstöð Holtagarða frá klukkan 10 á morgnanna til klukkan 22 á kvöldin. Á kjördag verður svo opið frá klukkan 10 til 17 fyrir þá sem eru á kjörskrá annars staðar en á höfuðborgarsvæðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×