Íslenski boltinn

Ekki spennandi að láta Valgeir fara rétt fyrir mót

Sindri Sverrisson skrifar
Valgeir Valgeirsson var í sigti sumra af bestu liðum landsins en spilar að óbreyttu í Lengjudeildinni í sumar.
Valgeir Valgeirsson var í sigti sumra af bestu liðum landsins en spilar að óbreyttu í Lengjudeildinni í sumar. vísir/vilhelm

Þrátt fyrir áhuga sumra af bestu liðum landsins á Valgeiri Valgeirssyni er útlit fyrir að þessi knái U21-landsliðsmaður í fótbolta muni spila áfram með HK í sumar, í Lengjudeildinni.

HK-ingar féllu úr efstu deild í fyrra og í vetur hafa borist tilboð í Valgeir, sem skorað hefur 8 mörk í 56 leikjum í efstu deild á Íslandi. HK samþykkti þó ekkert þeirra.

Valgeir var að láni hjá B-liði enska félagsins Brentford veturinn 2020-21 en lék 21 leik með HK í Pepsi Max-deildinni í fyrra, þegar HK féll. Samningur Valgeirs við HK gildir til loka þessa árs.

Frosti Reyr Rúnarsson, formaður knattspyrnudeildar HK, segir að ekkert nýtt tilboð hafi borist í Valgeir á síðustu vikum. Tilboðin sem bárust í vetur, meðal annars frá Víkingi og Breiðabliki samkvæmt Þungavigtinni, hafi einfaldlega ekki verið nógu góð og að hann reikni með að Valgeir spili í Kórnum í sumar:

„Já við gerum það. Reiknum bara með að hann verði frábær fyrir HK í sumar. Hann getur vonandi orðið einn af betri leikmönnum Lengjudeildarinnar,“ segir Frosti og á ekki von á að neitt breytist áður en félagaskiptaglugginn lokast á miðnætti 11. maí.

Staðan verulega breytt núna

„Staðan er náttúrulega verulega breytt núna frá því í vetur, því núna er mótið að hefjast og menn búnir að undirbúa liðið út frá ákveðnum leikmannahópi. Ég get ekki sagt að okkur þyki spennandi að láta hann fara rétt fyrir mót,“ segir Frosti. Aðspurður hvort að Valgeir sjálfur sé sáttur við þessa niðurstöðu segir Frosti að leikmaðurinn verði sjálfur að svara því:

„Ég veit ekki annað en að það séu allir sáttir, eða hafi að minnsta kosti skilning á stöðunni. En ég myndi halda að þetta sé leikmaður sem eigi fullt erindi í að spila fótbolta erlendis og vonandi kemur tækifæri til þess fyrir hann.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.