Pamelu Ander­son lúkkið sem er að gera allt vit­laust

Hulu þáttaröðin Pam & Tommy var frumsýnd í febrúar og fór lokaþátturinn í loftið fyrir mánuði síðan. Í þáttunum var fylgst með stormasömu ástarsambandi leikkonunnar Pamelu Anderson og Mötley Crüe trommarans Tommy Lee.

Það er leikkonan Lily James sem fer með hlutverk Pamelu og leikarinn Sebastian Stan sem bregður sér í hlutverk Tommy. Leikgervahönnuðum þáttanna tekst að breyta þeim í Pam og Tommy á hreint undraverðan hátt.

Lily James sagði frá því í viðtali við tímaritið Glamour að það hafi tekið fjóra klukkutíma fyrir hár- og förðunarteymið að breyta henni í Pamelu fyrir hverjar tökur. Ásamt varablýantinum, dökku augnförðuninni og ljósu hárinu, eru örþunnar augabrúnirnar burðarstólpi þegar kemur að því að ná útliti Pamelu.

Pamela Anderson er þekkt fyrir að vera ein mesta kynbomba tíunda áratugarins. Eftir vinsældir Pam & Tommy þáttanna hefur útlit hennar orðið eftirsóknarvert á nýjan leik - þar á meðal augabrúnirnar sem við ætluðum aldrei aftur að skarta.

Förðunarfræðingar keppast nú um að endurgera förðun Pamelu. Förðunarfræðingurinn- og TikTok stjarnan Embla Wigum er ein þeirra.

TikTok-stjarnan Danielle Macran spreytti sig einnig á Pamelu förðuninni og hafa rúmlega milljón manns horft á kennslumyndbandið.

Þá hefur verið búinn til sérstakur „filter“ á samfélagsmiðlinum TikTok þar sem notendur geta mátað útlit Pamelu án þess að taka upp förðunarbursta eða plokkara.

Sá „filter“ hefur notið gríðarlega vinsælda og virðist það freista margra að draga fram plokkarann. Hann gæti þó verið aftarlega í skápnum hjá mörgum, þar sem þykkar og náttúrulegar augabrúnir hafa verið mest áberandi síðustu ár og margir hverjir hafa fjárfest í augabrúnameðferðum á borð við „microblade“ eða „brow lift“.

Sjá: Allt sem þú þarft að vita um sápuaugabrúnir

„Þessar þunnu og vel snyrtu augabrúnir geta haft birtandi áhrif á allt augnsvæðið,“ segir förðunarfræðingurinn Troy Surratt í viðtali við tískutímaritið Vogue.

Hann segir að jafnframt geti slíkar augabrúnir skapað aukið rými fyrir ýktar augnfarðanir. En hið fræga Pamelu Anderson útlit inniheldur einmitt dökka og mikla augnförðun.

Surrat tekur þó fram að of skarpar augabrúnir geti gefið andlitinu hvasst yfirbragð.

„Ég hef hjálpað þúsundum kvenna að endurheimta sínar náttúrulegu augabrúnir eftir tíunda áratuginn og ég veit hvaða skaða það getur valdið að ofplokka brúnirnar. Þess vegna mæli ég sterklega gegn því að fólk noti plokkarann ef það vill prófa sig áfram með þetta útlit,“ segir Kristie Streicher, einn færasti augabrúnasérfræðingur í Los Angeles.

Þess í stað mælir hún með því að fólk móti augabrúnirnar með því að greiða þær niður og klípa hárin saman. Ef augabrúnirnar eru mjög þykkar, þá mælir hún frekar með því að nota svokallaða augabrúnahnífa í stað plokkara. Með því sé ekki verið að valda hársekkjunum varanlegum skaða.

Þeir förðunarfræðingar sem hafa endurgert Pamelu förðunina hafa verið að nota límstifti til þess að líma sínar náttúrulegu brúnir niður. Þau sem eru með þykkar augabrúnir gætu þurft að fara nokkrar umferðir með límstiftinu.

Eftir að límið hefur þornað er púðrað yfir allt svæðið áður en brúnirnar eru huldar með hyljara. Því næst er hægt að teikna nýjar augabrúnir á.

Hægt er að sjá þessa aðferð í myndbandinu hér að neðan þar sem förðunarfræðingurinn og samfélagsmiðlastjarnan Jean Watts endurgerir útlit Pamelu.