Íslenskar mínútur víðsvegar um Evrópu

Dagný Brynjarsdóttir spilaði allan leikinn á miðju West Ham í 0-1 útisigri á Birmingham í ensku ofur deildinni í dag. Sigurinn lyftir West Ham upp fyrir Reading í sjötta sæti deildarinnar en bæði lið eru með 23 stig. Birmingham er áfram fast á botni deildarinnar eftir sjötta tapleikinn í röð. Það virðist fátt geta komið í veg fyrir að Birmingham falli úr deildinni.

Hjörtur Hermannsson kom inn á sem varamaður fyrir Pisa á 81. mínútu í 3-0 sigri liðsins á Cremonese í uppgjöri toppliðanna í ítölsku B deildinni. Sigurinn þýðir að Pisa stekkur yfir Þóri Jóhann og félaga í Lecce og upp í toppsæti deildarinnar þegar 9. umferðir eru eftir. Pisa er með 55 stig á meðan Leccer er með 54 stig. Cremonese fylgir svo fast á eftir með 53 stig í þriðja sæti.

Hólmbert Aron Friðjónsson, framherji Lillestrom, hafði betur gegn Óttari Húna Magnússyni og hans liðsfélögum í Nardo í uppgjöri Íslendingaliðanna í norska bikarnum í dag. Lillestrom vann öruggan 0-4 sigur. Óttar Hún spilaði allar 90 mínúturnar í vörn Nardo en Hólmbert fyrstu 65 mínúturnar áður en honum var skipt af velli í stöðunni 0-3.