Lukaku skaut Chelsea í úrslit HM

Leikið var í tæplega tuttugu stiga hita á Mohammed Bin Zayed-vellinum í Abú Dabí. Evrópumeistarar Chelsea voru meira með boltann og það skilaði þeim marki eftir rúmlega hálftíma leik, en þar var að verki balgíski framherjinn Romelu Lukaku.

Þetta reyndist eina mark fyrri hálfleiskins og staðan var því 1-0 þegar gengið var til búningsherbergja.

Lundúnaliðið var sterkari aðilinn í upphafi síðari hálfleiks, en náði ekki að bæta við marki. Andstæðingar þeirra í Al-Hilal fengu nokkur ágætis færi til að finna jöfnunarmark, en allt kom fyrir ekki og niðurstaðan varð 1-0 sigur Chelsea.

Chelsea er því á leið í úrslitaleik Heimsmeistaramóts félagsliða þar sem liðið mætir brasilíska liðinu Palmeiras á laugardaginn.