Erlent

Hótar óbólusettum aftur handtökum

Samúel Karl Ólason skrifar
Rodrigo Duterte, forseti Filippseyja.
Rodrigo Duterte, forseti Filippseyja. EPA-EFE/FRANCIS R. MALASIG

Rodrigo Duterte, forseti Filippseyja, hótaði því í dag að láta handtaka óbólusett fólk ef þau yfirgefi heimili sín. Faraldur kórónuveirunnar þar í landi er í mikilli dreifingu en fjöldi nýsmitaðra hefur tvöfaldast á nokkrum dögum.

Í sjónvarpsávarpi biðlaði hann til embættismanna að finna óbólusetta Filippseyinga og tryggja að þau brjóti ekki gegn útgöngubanni. Hinn mjög svo umdeildi forseti sagði að streitist fólk gegn útgöngubanninu megi lögreglan nú handtaka það.

Tilkynnt var í dag að 17.220 hefði greinst smitaðir af Covid-19. Í heildina hafa um 51.700 manns dáið vegna veirunnar, svo vitað sé.

„Ég ber ábyrgð á öryggi og velsæld Filippseyinga,“ hefur Reuters eftir Duterte. Hvatti hann þá sem væru ósammála til að höfða mál gegn honum.

Þetta er ekki í fyrsta sinn sem hann hótar óbólusettum handtökum en í fyrra, þegar sambærilegum aðgerðum var beitt og nú sagði hann til að mynda að honum væri sama þó fólk sem afþakkaði bóluefni myndi deyja.

Sjá einnig: „Mín vegna megið þið deyja hvenær sem er“

Í stjórnartíð Dutertes hefur hann farið hart fram gegn fíkniefnum og neytendum þeirra í Filippseyjum. Talið er að lögregluþjónar og hermenn hafi drepið tugi þúsunda í þessu meinta stríði.

Ísland lagði árið 2019 fram tillögu um úttekt á stöðu mannréttindamála á Filippseyjum í mannréttindaráði SÞ. Sú úttekt leiddi í ljós hve margir hefðu mögulega dáið.


Tengdar fréttir

Óskaarftaki Duterte hættir við forsetaframboð

Christopher „Bong“ Go, öldungadeildarþingmaðurinn sem Rodrigo Duterte forseti Filippseyja vildi að tæki við af sér hefur ákveðið að bjóða sig ekki fram til forseta. Nú er því enginn í framboði sem núverandi ríkisstjórn styður.

Sara Duterte fer í fram­boð

Sara Duterte, dóttir Rodrigos Duterte, hefur tilkynnt framboð sitt til varaforseta Filippseyja. Stjórnmálaskýrendur höfðu margir búist við að hún byði sig fram til forseta landsins.

Duterte blótar Íslendingum í sand og ösku og vonar að þjóðin frjósi í hel

Rodrigo Duterte, forseti Filippseyja, sparaði ekki stóru orðin um Ísland og Íslendinga í ræðu sem hann hélt í gær í Quezon-borg á Filippseyjum. Gagnrýndi hann stefnu Íslands hvað varðar þungunarrof harkalega. Kallaði hann Íslendinga drullusokka og fábjána, auk þess sem að hann sagðist vona að þjóðin frjósi í hel.

Duterte hótar andstæðingum sínum fangelsi

Ásakanir hafa verið á lofti um að Durterte Filippseyjaforseti hafi brotið á stjórnarskrá landsins. Hann manar andstæðinga sína til að kæra sig fyrir embættisbrot því hann muni fangelsa þá.

Duterte deilir við sjötuga nunnu

Forseti Filippseyja, Rodrigo Duterte, hefur tekið upp deilur við systur Patriciu Fox. Systir Fox stofnaði ásamt öðrum kirkjuna Our Lady of Sion árið 1990 í Manila og hefur síðan þá unnið góðgerðarstarf með fátækum og öðrum jaðarsettum hópum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×