Sveppamorðingi fær enga reynslu­lausn

Erin Patterson, 52 ára, var fundin sek í ágúst í fyrra um að hafa myrt þrjá ættingja sína og tilraun til manndráps með því að bera fram eitraða máltíð með sveppum árið 2023. Hún var dæmd í lífstíðarfangelsi, með 33 ára lágmarksafplánun áður en hún gæti sótt um reynslulausn. Dómarar hafa nú úrskurðað að hún losni aldrei úr fangelsi. Fjallað er um málið á vef BBC. 

Dómarar sögðu brot hennar „einstaklega köld og úthugsuð“ og þau bæri að fordæma.

„Við höfum komist að þeirri niðurstöðu að um svo hrottafengna glæpi hafi verið að ræða að ekki sé við hæfi að ákveða lágmarksafplánun áður en hægt er að sækja um reynslulausn,“ sagði Stephen McLeish dómari fyrir hönd dómsins.

Getur áfrýjað

Patterson hefur nú 28 daga til að ákveða hvort hún leiti til Hæstaréttar Ástralíu og áfrýi þessari niðurstöðu áfrýjunardómstólsins. Það er hennar síðasta von í að fá dómi sínum hnekkt. 

Að loknum umfangsmiklum réttarhöldum á síðasta ári fann kviðdómur Patterson seka um að hafa myrt tengdaforeldra sína, Don og Gail Patterson, og Heather Wilkinson, móðursystur sína, með því að bera fram nautakjötsréttinn Beef Wellington. Í réttinum voru dauðahattarsveppir, sem eru baneitraðir.

Patterson var einnig fundin sek um tilraun til manndráps á Ian Wilkinson, eiginmanni Heather og presti. Þeir borðuðu einnig eitraða máltíðina á heimili Patterson. Wilkinson lifði eitrunina af eftir að hafa dvalið vikum saman á sjúkrahúsi en glímir enn við heilsufarsvandamál.

Simon Patterson, fyrrverandi eiginmaður Erin, átti að vera viðstaddur hádegisverðinn en afboðaði sig á síðustu stundu. Það gerði hann meðal annars vegna þess að hann taldi hana hafa ítrekað reynt að eitra fyrir sér.

Patterson áfrýjaði dómnum skömmu eftir að hann féll og var í áfrýjun meðal annars vísað til hótelbókana sem hefðu haft „stórfelldar afleiðingar“ og grafið undan réttmæti réttarhaldanna en kviðdómendur höfðu gist á sama hóteli og saksóknarar, lykilvitni lögreglu og fjölmiðlafólk.

Hótelbókun og áhugamál

Lögmenn hennar héldu því einnig fram að ákveðin sönnunargögn sem lögð hefðu verið fyrir kviðdóminn hefðu verið óviðkomandi málinu og til þess fallin að hafa áhrif á afstöðu kviðdómenda. Þar á meðal voru gögn úr farsímasendum sem bentu til þess að Patterson hefði farið á svæði þar sem dauðahattarsveppi væri að finna, auk færslna á Facebook þar sem hún kvartaði undan tengdafjölskyldu sinni.

Þá hefðu dómarar ranglega meinað verjendum að leggja fram önnur gögn sem hefðu sýnt fram á að sveppatínsla hefði lengi verið áhugamál Patterson, sem á tvö börn.

Verjendur héldu því jafnframt fram að fimm daga yfirheyrsla ákæruvaldsins yfir Patterson hefði verið „ósanngjörn og þrúgandi“ og að ákæruvaldið hefði verið ósamkvæmt sjálfu sér í málflutningi sínum um hugsanlega ástæðu verknaðarins. Dómararnir höfnuðu þessu öllu þegar þeir tóku málið fyrir í dag.