Skytturnar ekki í vand­ræðum gegn Kanarí­fuglunum

Arsenal var án þriggja leikmanna vegna kórónuveirunnar er liðið heimsótti Norwich City í dag. Þrátt fyrir að þurfa að færa menn til í öftustu línu þó kom það ekki að sök þar sem Arsenal vann einkar öruggan 5-0 sigur.

Bukayo Saka kom gestunum yfir snemma leiks eftir undirbúning Martin Ødegaard. Virtist sem það myndi vera eina mark fyrri hálfleiks en undir lok hans tvöfaldaði Arsenal forystuna.

Aftur var það Ødegaard sem lagði upp á örvfættan leikmann en að þessu sinni skoraði Kieran Tierney markið. Staðan 2-0 Skyttunum í vil í hálfleik.

Um miðbik síðari hálfleiks gulltryggði Saka sigur gestanna með góðu skoti fyrir utan vítateig. Staðan orðin 3-0 og þó sigurinn væri gulltryggður bættu gestirnir enn frekar í.

Þegar sex mínútur lifðu leiks fengu gestirnir frá Lundúnum vítaspyrnu. Alexandre Lacazette fór á punktinn og kom Arsenal fjórum mörkum yfir. Varamaðurinn Emile Smith-Rowe skoraði fimmta mark gestanna í uppbótartíma.

Lokatölur 5-0 Skyttunum í vil og lærisveinar Mikel Arteta komnir upp í 4. sæti deildarinnar með 35 stig.