Hefur haldið markinu hreinu í fjórum af fyrstu fimm lands­leikjunum sínum

Cecilía Rán hefur haldið markinu hreinu í þremur síðustu leikjum sínum og það eru 288 mínútur síðan skorað var hjá henni í A-landsleik.

Cecilía hefur spilað fimm landsleiki og aðeins fengið á sig eitt mark í þeim. Það mark skoraði Ítalinn Arianna Caruso á 72. mínútu í 1-0 sigri á Íslandi í apríl síðastliðinn. Caruso er leikmaður ítalska stórliðsins Juventus.

Cecilía hélt marki sínu hreinu í fyrsta landsleiknum sínum sem var 4. mars 2020 á móti Norður Írlandi. Landsleikurinn á móti Ítalíu í apríl var hennar annar landsleikur.

Hún hefur síðan haldið markinu í þremur leikjum eða í 2-0 sigri á Írlandi í júní, í 5-0 sigri á Kýpur í október og loks í 2-0 sigrinum á Japan í gær.

Cecilía Rán var að klára sitt fyrsta tímabil í atvinnumennsku með sænska liðinu Örebro en fram undan hjá henni er að færa sig yfir til enska úrvalsdeildarliðsins Everton sem hafði lánað hana til Svíþjóðar.