Ellefu ára stelpa þarf ekki að borga 452 þúsund krónur fyrir treyju Ronaldo

Hin ellefu ára gamla Addison Whelan komst framhjá öryggisvörðum og inn á völlinn í leikslok þegar Írland og Portúgal gerðu markalaust jafntefli í undankeppni HM fyrir helgi en leikurinn fór fram í Dublin.

Ronaldo tók vel á móti stelpunni sem er mikill aðdáandi hans. Hann gaf sér smá tíma með henni og sagði öryggisvörðunum að bíða. Ronaldo endaði síðan á því að gefa henni keppnistreyju sína í leiknum.

Það voru örugglega nokkrir írskir landsliðsmenn ósáttir með það að fá ekki að skipta um treyju við Ronaldo.

Addison fékk nokkra fjölmiðlaathygli eftir leikinn og þegar hún frétti það að hún ætti að þrjú þúsund evru sekt fyrir uppátækið þá sagði hún engar áhyggjur hafa af því.

„Ég fékk sekt fyrir að hlaupa inn á völlinn. Pabbi ætlar að borga hana,“ sagði Addison Whelan í viðtali við írsku útvarpsstöðina FM104.

Hvort sem að þetta væri afmælis-, jóla eða fermingargjöf þremur árum of snemma þá er 452 þúsund króna treyja aðeins of vel útlátin gjöf.

Um helgina fréttist hins vegar að írska knattspyrnusambandið ætlaði ekki að láta stelpuna borga þessa sekt eftir allt saman. ESPN segir frá.

„Írska knattspyrnusambandið getur staðfest það að ungi aðdáandinn Addison Whelan mun ekki fá sekt fyrir að hlaupa til Cristiano Ronaldo,“ sagði í yfirlýsingu frá sambandinu.

„Við viljum fullvissa Addison um það að auðvitað fær hún ekki neina sekt fyrir að hlaupa inn á völlinn og biðja um treyju Ronaldo,“ sagði talsmaður írska sambandsins Cathal Dervan.

Addison Whelan sagði sjálf frá atburðarásinni í viðtölum. 

„Ég hoppaði yfir tálmann af því ég var í annarri röð. Svo hljóp ég inn á völlinn en það voru öryggisverðir á eftir mér. Ég hélt áfram að hlaupa. Ég reyndi að komast að miðlínunni en þeir náðu mér. Þá öskraði ég nafnið hans Ronaldo. Hann snéri sér við, sá mig og sagði þeim að leyfa mér að koma,“ sagði Addison.

„Ég kallaði á hann og hann kom til mín. Ég var í sjokki og var grátandi. Ég spurði hann: Má ég fá treyjuna þína? Gerðu það, ég er mikill aðdáandi, risa aðdáandi. Hann sagði: Er allt í lagi?“ sagði Addison.

Addison þykir efnileg íþróttakona og hver veit nema að við eigum eftir að heyra meira um hana í framtíðinni.