Bíó og sjónvarp

Ánægð með árangurinn í keppni við sjálfan Bond

Fanndís Birna Logadóttir skrifar
Myndin, sem heitir Lamb á alþjóðavísu, hefur hlotið mikið lof gagnrýnenda víða um heim. 
Myndin, sem heitir Lamb á alþjóðavísu, hefur hlotið mikið lof gagnrýnenda víða um heim. 

Kvikmyndin Dýrið var sýnd í hátt í 600 kvikmyndahúsum í Bandaríkjunum um helgina og þénaði ríflega eina milljón Bandaríkjadali í gegnum miðasölu á fyrstu þremur dögunum í sýningu. Dýrið, eða Lamb eins og hún heitir á alþjóðavísu, er því tekjuhæsta íslenska kvikmyndin sem sýnd hefur verið í Bandaríkjunum.

Valdimar Jóhannsson, leikstjóri myndarinnar, er nú staddur á Spáni þar sem Dýrið var frumsýnt á kvikmyndahátíð í gær en hann er þar staddur ásamt Hrönn Kristinsdóttur, öðrum framleiðanda myndarinnar.

Þau segja viðtökurnar hafa verið frábærar og fagna því að Dýrið hafi verið sjöunda vinsælasta myndin í Bandaríkjunum eftir helgina en þau voru þar í keppni við sjálfan James Bond.

Aðspurð um metið sem þau hafa nú slegið með velgengni myndarinnar í Bandaríkjunum segja Hrönn og Valdimar að þau væru gjarnan til í að slá svipað met hér á Íslandi, þar sem aðsókn hér hefur verið heldur dræm.

„Það væri æðislegt ef að fólk myndi drífa sig í bíó, þetta er eiginlega mynd sem að maður ætti að sjá í bíó,“ segir Valdimar.

Hér má sjá Söru Nassim, framleiðanda, Valdimar Jóhannsson, leikstjóra, Hrönn Kristinsdóttur, framleiðanda og Eli Arenson, kvikmyndatökumann.Aðsend

Annars staðar í heiminum hafa viðtökurnar þó verið frábærar að þeirra sögn, þar á meðal á Spáni og í Mexíkó þar sem myndin var sýnd nýverið, en þau eru á leið til Lundúna á næstu dögum fyrir London Film Festival.

Þau segja ótrúlegt að lítil íslensk kvikmynd hafi náð þessum árangri og það hafi verið skrýtið að sjá hvernig fólk tengdi á mismunandi hátt við myndina.

„Viðtökurnar hafa bara verið alveg stórkostlega góðar og það er bara gaman að sjá á hverjum stað hvað fólk bregst misjafnt við, en heilt yfir þá hafa viðtökurnar verið frábærar,” segir Hrönn Kristinsdóttir, annar framleiðandi myndarinnar.

„Við erum bara ótrúlega þakklát fyrir viðbrögðin og þetta gleður okkur alveg ótrúlega mikið,” segir Valdimar Jóhannsson, leikstjóri kvikmyndarinnar Dýrið.


Tengdar fréttir

Dýrið frumsýnd á 600 tjöldum í Bandaríkjunum í dag

Íslenska kvikmyndin Dýrið. eða Lamb eins og hún heitir erlendis, verður sýnd á 600 tjöldum í Bandaríkjunum í dag. Aldrei áður hefur íslensk kvikmynd fengið jafn mikla almenna dreifingu vestanhafs.

Dýrið hlaut verð­laun í Cannes

Íslenska kvikmyndin Dýrið hlaut nú rétt í þessu „Prize of Originality“ verðlaunin í Un Certain Regard keppninni sem er hluti af aðaldagskrá alþjóðlegu kvikmyndahátíðarinnar í Cannes.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.