Óljóst hvort Ólafur verði áfram með FH

Ólafur Jóhannesson tók við FH í júní eftir að Logi Ólafsson var látinn taka pokann sinn. Ólafur samdi við FH út tímabilið sem lauk um helgina. Þjálfaramál FH eru núna í vinnslu.

„Það er verið að vinna í þessu. Við erum að skoða málin og ætlum að reyna að hafa þetta klárt mjög fljótlega,“ sagði Valdimar Svavarsson, formaður knattspyrnudeildar FH, í samtali við Vísi.

En er áhugi fyrir því að halda samstarfinu við Ólaf áfram?

„Við tjáum okkur ekki um það. Það eru umræður í gangi og auðvitað hlýtur núverandi þjálfari að vera einn af fyrstu möguleikunum okkar. Við sjáum bara hvernig það fer,“ sagði Valdimar og bætti við að þjálfaramál FH verði komin á hreint fyrr en seinna. Þar á bæ flýta menn sér þó hægt og ætla að vanda sig.

Ljóst er að Guðmann Þórisson verður ekki áfram hjá FH en ekki er ljóst hvað verður um aðra samningslausa leikmenn. Samningar þeirra Péturs Viðarssonar, Hjartar Loga Valgarðssonar, Mortens Beck Andersen og Atla Gunnars Guðmundssonar renna út síðar á árinu.

„Við erum að fara yfir það. Nokkrir leikmenn eru samningslausir og eins og önnur lið erum við að skoða heildarpakkann hjá okkur. Þetta snýst líka um hver stýrir liðinu og við munum ekki ganga frá öllu þótt það séu nokkrir hlutir sem við erum nokkuð vissir um hvernig við viljum hafa. En við höldum einhverju opnu og erum með einhverja anga úti,“ sagði Valdimar.

FH endaði í 6. sæti Pepsi Max-deildarinnar með 33 stig.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði.