Íslenski boltinn

Loka­um­­ferð deildarinnar: Ís­lands­meistarar krýndir, mögu­legt Evrópu­sæti í boði og hvaða lið fellur?

Runólfur Trausti Þórhallsson skrifar
Víkingur og Breiðablik geta orðið Íslandsmeistarar í dag.
Víkingur og Breiðablik geta orðið Íslandsmeistarar í dag. Vísir/Hulda Margrét

Sjaldan eða aldrei hefur verið eins mikil spenna fyrir lokaumferð efstu deildar karla í fótbolta og er í dag. Klukkan 16.00 í dag verður ljóst hvaða lið er Íslandsmeistari í knattspyrnu karla árið 2021 sem og hvaða lið mun fylgja Fylki niður í Lengjudeildina.

Bæði Víkingur og Breiðablik geta orðið Íslandsmeistari. Víkingar urðu síðast meistarar árið 1991, fyrir sléttum 30 árum síðan. Breiðablik hefur beðið í töluvert styttri tíma en samt sem áður er meira en áratugur síðan félagið varð Íslandsmeistari. Það gerðist síðast haustið 2010.

Hér að neðan má sjá stöðuna í deildinni en aðeins munar einu stigi á toppliðunum tveimur fyrir lokaumferðina sem hefst klukkan 14.00 í dag.

Staðan í deildinni

1. Víkingur - 45 stig, +15 í markatölu

2. Breiðablik - 44 stig, +31 í markatölu

3. KA - 39 stig, +16 í markatölu

4. KR - 38 stig, +14 í markatölu

5. Valur - 36 stig, +5 í markatölu

6. FH - 32 stig, +13 í markatölu

7. Stjarnan - 22 stig, -10 í markatölu

8. Leiknir Reykjavík - 22 stig, -14 í markatölu

9. Keflavík - 21 stig, -14 í markatölu

10. HK - 20 stig, -15 í markatölu

11. ÍA - 18 stig, -16 í markatölu

12. Fylkir - 16 stig, -27 í markatölu

Það er hins vegar nóg annað sem getur gerst í dag. Í ljós kemur hvaða lið nær hinu eftirsótta 3. sæti Pepsi Max-deildarinnar. Sætið var reyndar eftirsóttara hér á árum áður þar sem það þýddi þátttöku í Evrópukeppni árið eftir. 

Það er ekki öruggt að þessu sinni en fari svo að Víkingur vinni Mjólkurbikarinn þá mun 3. sætið gefa þátttöku í Evrópu á næstu leiktíð.

Svo á eftir að koma í ljós hvaða lið fellur með Fylki niður í Lengjudeildina. Enn eru þrjú lið sem geta fallið, það eru HK, ÍA og Keflavík. Tvö síðastnefndu liðin mætast í dag í leik þar sem sæti í deild þeirra bestu að ári er undir.

Leikir dagsins

Víkingur – Leiknir Reykjavík

Breiðablik – HK

KA – FH

Stjarnan – KR

Keflavík – ÍA

Fylkir – Valur

Á heimavelli hamingjunnar í Fossvogi mætast Víkingur og Leiknir Reykjavík. Gestirnir hafa tryggt sæti sitt í deildinni og hafa ekki sýnt mikið síðan það var ljóst. Staðan er hins vegar þannig að ef heimamenn vinna er Íslandsmeistaratitillinn þeirra. 

Það er hins vegar vert að taka fram að Víkingar hafa ekki enn unnið Leikni í efstu deild karla í knattspyrnu.

Sigur gulltryggir Íslandsmeistaratitilinn en jafntefli gæti einnig dugað fari svo að Breiðablik vinni ekki sinn leik. Ef Breiðablik tapar gegn HK þá skiptir engu máli hvernig leikur Víkings og Leiknis fer. 

Þó Leiknir hafi í raun ekki að miklu að keppa þá hafa liðin háð nokkrar hatrammar rimmur í 1. deildinni hér á árum áður og þá eru einnig nokkrir Blikar í liði Leiknis. Þeir vilja eflaust hjálpa uppeldisfélagi sínu að landa þeim stóra.

Ef HK tekst að forðast tap er ljóst að liðið heldur sæti sínu í deildinni. Þar sem Keflavík og ÍA mætast dugir HK stig á morgun til að halda sæti sínu. 

Keflavík dugir einnig stig til að tryggja sæti sitt en tap gæti þýtt fall ef HK nær í stig á Kópavogsvelli. Það er hins vegar ljóst að ÍA verður að næla í öll þrjú stigin sem í boði eru til að halda sæti sínu. 

Ef það gerist þá þurfa Keflvíkingar að horfa til Kópavogsvallar í þeirri von um að Blikar séu að vinna nágranna sína því annars fellur Keflavík á markatölu.

Ljóst er að Keflavík, HK og ÍA verða ekki öll í Pepsi Max deild karla sumarið 2022. Hvaða lið fellur um deild?Vísir/Hulda Margrét/Bára Dröfn

KA tekur á móti FH á meðan KR heimsækir Stjörnuna í Garðabænum. FH og Stjarnan hafa að litlu að keppa en KA og KR eru í baráttunni um þriðja sætið. Ef Víkingar landa sigri í Mjólkurbikarnum mun þriðja sætið veita þátttöku í Sambandsdeild UEFA á næstu leiktíð. 

Það er því til mikils að vinna fyrir bæði lið og KA er í frábærum málum þar sem KR tapaði gegn Víking í síðustu umferð. Að leggja FH þessa dagana er þó hægara sagt en gert eins og Blikar komust að á dögunum. Það verður því einnig áhugavert að fylgjast með leik þessarra liða þar sem tugir milljóna eru mögulega í húfi.

KR og KA eiga bæði möguleika á að ná 3. sæti Pepsi Max deildar karla.Vísir/Hulda Margrét

Fari svo að FH vinni með þremur mörkum eða meira dugir KR jafntefli til að ná 3. sætinu en liðið væri þá með betri markatölu en KA.

Í Árbænum tekur svo Fylkir á móti Val, sá leikur skiptir engu máli.

Stöð 2 Sport verður með veglega dagskrá í dag. Upphitun Pepsi Max stúkunnar hefst klukkan 13:00 og hægt verður að fylgjast með öllum leikjunum samtímis í þættinum. 

Þá verða allir leikirnir í lokaumferðinni sýndir beint og klukkan 20:00 er svo komið að uppgjörsþætti. 


Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði.


Tengdar fréttir

Bikarinn verður miðja vegu á milli Víkinnar og Smárans

Íslandsmeistarabikarinn fer annað hvort á loft á Víkingsvelli eða Kópavogsvelli. Á meðan leikjunum í lokaumferðinni í Pepsi Max-deild karla verður bikarinn í vörslu starfsmanns KSÍ á miðlægum stað.




Fleiri fréttir

Sjá meira


×