Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins segir í samtali við Vísi að bólusetningar við inflúensu hefjist 15. október og þeir sem eru 60 ára og eldri og einstaklingar með undirliggjandi sjúkdóma hvattir til að mæta.
Í fyrra bárust 70.000 skammtar af bóluefni við inflúensu sem kláruðust nokkuð hratt. Ragnheiður býst við að 95 þúsund skammtar dugi í ár, því í fyrra voru fengnir auka skammtar til landsins sem kláruðust ekki.
Áhugi á bólusetningu við inflúensu hefur aukist mikið vegna kórónuveirufaraldursins. Ingileif Jónsdóttir, prófessor í ónæmisfræði, sagði í samtali við fréttastofu í fyrra að það geti reynst hættulegt að smitast af kórónuveirunni og inflúensu á sama tíma.
Ragnheiður Ósk segir mismunandi hvernig fólk getur borið sig eftir því að bóka tíma í bólusetningu og það fari að stórum hluta eftir heilsugæslustöðvum. Í sumum tilvikum sé í boði að bóka bólusetningu í gegnum vef Heilsuveru en á öðrum stöðum þurfi að hringja og panta.
