Íslenski boltinn

Liðs­fé­lagarnir hlæja að henni fyrir orða­notkun í klefanum

Óskar Ófeigur Jónsson skrifar
Dóra María Lárusdóttir er hér fyrir miðju að fagna Íslandsmeistaratitlinum með Valskonum.
Dóra María Lárusdóttir er hér fyrir miðju að fagna Íslandsmeistaratitlinum með Valskonum. Vísir/Hulda Margrét

Dóra María Lárusdóttir varð á dögunum Íslandsmeistari í áttunda skiptið á ferlinum en hún er enn í lykilhlutverki hjá Valsliðinu og var einn af bestu leikmönnum deildarinnar í sumar.

Dóra María spilaði alla átta leikina og var með eitt mark og níu stoðsendingar í þeim. Hún hefur nú spilað 269 leiki í efstu deild og skorað í þeim 94 mörk. Enginn útileikmaður hefur spilað fleiri leiki í sögu deildarinnar.

Dóra María vann sinn fyrsta titil með Val árið 2001 þegar Valsliðið varð bikarmeistari og nú spila með henni nokkrir leikmenn sem voru ekki fæddar þegar hún byrjaði að koma með titla á Hlíðarenda.

Ída Marín Hermannsdóttir og Arna Eiríksdóttir, sem báðar skoruðu fyrir Val í deildinni í sumar, eru báðar fæddar árið 2002. Ída Marín var í risastóru hlutverki í Valsliðinu og skoraði fimm mörk.

Dóra María ræddi þetta í viðtali við Fréttablaðið og þar viðurkenndi hún að finna fyrir aldrinum, ekki inn á vellinum heldur inn í búningsklefanum.

„Ég upplifi mig oft sem mikið aðhlátursefni í klefanum. Þær stelpurnar hlæja að mér eins og ég að mömmu minni fyrir orðanotkun og annað. Ég er alltaf að reyna að vera hipp og kúl en með misjöfnum árangri,“ sagði Dóra María í viðtali í Fréttablaðinu í dag.

Dóra María er 36 ára gömul en það er ekki að heyra á henni að hún sé að hætta í boltanum.

„Það er fullt af spennandi hlutum í gangi. Valur er með geggjað lið núna og að komast í riðlakeppni meistaradeildarinnar er raunhæfur möguleiki. Mér fannst tímabilið í fyrra svolítið leiðinlegt með öllum þessum Covid-stoppum en ég sagði nú einhvern tímann að það væri erfitt að finna tímapunkt til að hætta, hvað þá þegar vel gengur. Sjáum til,“ sagði Dóra María við Fréttablaðið en það má sjá alla greinina um hana hér.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.