Íslenski boltinn

Þjálfari Kórdrengja dæmdur í fimm leikja bann

Hjörtur Leó Guðjónsson skrifar
Davíð Smári Lamude, þjálfari Kórdrengja, hefur verið dæmdur í fimm leikja bann.
Davíð Smári Lamude, þjálfari Kórdrengja, hefur verið dæmdur í fimm leikja bann. vísir/Hulda Margrét

Davíð Smári Lamude, þjálfari Kórdrengja í Lengjudeild karla, hefur verið dæmdur í fimm leikja bann fyrir atvik sem átti sér stað eftir leik liðsins gegn Fram á dögunum.

Kórdrengir leiddu leikinn þegar komið var í uppbótartíma, en Davíð Smári virtist mjög ósáttur með það hversu miklu Egill Arnar Sigurþórsson, dómari leiksins, og kollegar hans bættu við.

Egill lét ekki bjóða sér þessa framkomu og gaf Davíð beint rautt spjald. Á fimmtu mínútu uppbótartíma jöfnuðu Framarar svo leikinn og þá sauð upp úr. 

Davíð rauk inn á völlinn og jós fúkyrðum yfir Egil dómara. Í hamaganginum reif hann spjöldin af Agli, en skilaði þeim þó að lokum.

Þetta var í annað skipti á tímabilinu sem Davíð fær að líta rauða spjaldið og nú fær hann alls fimm leikja bann. Félagið fær einnig 15.000 króna sekt, en Davíð missir af lokaleik tímabilsins og upphafi þess næsta. Kórdrengir mæta Vestra í lokaleik tímabilsins, en liðið situr í fjórða sæti Lengjudeildarinnar og getur með sigri lyft sér upp í það þriðja.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.