Fá að heita Svarthöfði, Bond, Saara og Blár

Eiður Þór Árnason skrifar 24. ágúst 2021 14:09

Enn bætist í flóru íslenskra mannanafna. Vísir/vilhelm

Mannanafnanefnd samþykkti nýverið að færa nöfnin Svarthöfði, Bond, Appollo og Blár á mannanafnaskrá. Þá bættist Skylar í ört stækkandi hóp kynhlutlausra eiginnafna.

Ekki hlutu allar tillögur náð fyrir augum nefndarinnar og fengu millinöfnin Welding, Degen og Octavius til að mynda rauða stimpilinn, meðal annars á grundvelli þess að vera ættarnafn eða ekki dregið af íslenskum orðstofni. Ólíkar reglur gilda um eiginnöfn og millinöfn sem birtist meðal annars í því að Octavius var samþykkt sem eiginnafn en ekki sem millinafn.

Mannanafnanefnd felldi alls 24 úrskurði þann 6. og 11. ágúst síðastliðinn. Í rökstuðningi hennar fyrir samþykkt Svarthöfða segir meðal annars að eiginnafnið taki íslenska beygingu í eignarfalli og hafi tíðast á Íslandi á öldum áður. Í Íslendingabók má finna 23 einstaklinga sem hafa borið nafnið en aðeins einn þeirra, Alex Gló Svarthöfði Sigurðar, er á lífi og fæddist árið 2006.

Blár, um Blá, frá Blá, til Blás

Að sögn mannanafnanefndar getur eiginnafnið Blár talist leitt af karlkynsnafnorðinu blár og telst það uppfylla lög um mannanöfn. Nafnið beygist svona: Hér er Blár, um Blá, frá Blá, til Blás.

Um kvenkynseiginnafnið May segir nefndin að fimm konur beri nafnið í Þjóðskrá og rithátturinn hafi unnið sér hefð í íslensku. Í öðrum úrskurði segir að eiginnafnið Apollosé að uppruna forngrískt, Apollōn. Umritunin Apollo tíðkist í ensku og fleiri málum og telst rithátturinn því uppfylla skilyrði nefndarinnar.

Á sama fundi samþykkti nefndin kvenkynseiginnafnið Kona en Vísir ræddi nýverið við Elínu Konu Eddudóttur sem hefur beðið eftir niðurstöðunni í tvö ár. Mannanafnanefnd neitaði því fyrst að færa nafnið á mannanafnaskrá en tók málið upp aftur eftir að umboðsmaður Alþingis komst að þeirri niðurstöðu að úrskurðurinn hafi ekki verði í samræmi við lög.

Nöfn sem voru samþykkt

Karlkynseiginnafnið António
Karlkynseiginnafnið Annþór
Karlkynseiginnafnið Apollo
Karlkynseiginnafnið Blár
Karlkynseiginnafnið Bond
Karlkynseiginnafnið Charlie
Karlkynseiginnafnið Eljar
Karlkynseiginnafnið Foss
Karlkynseiginnafnið Octavius
Karlkynseiginnafnið Svarthöfði
Kvenkynseiginnafnið Eileif
Kvenkynseiginnafnið Kona
Kvenkynseiginnafnið Kvika
Kvenkynseiginnafnið Lissie
Kvenkynseiginnafnið May
Kvenkynseiginnafnið Saara
Kvenkynseiginnafnið Sarah
Kvenkynseiginnafnið Thalia
Kynhlutlausa eiginnafnið Skylar
Millinafnið Dalland

Nöfnum sem var hafnað

Karlkynseiginnafnið Gunnarson
Millinafnið Degen
Millinafnið Foss
Millinafnið Octavius
Millinafnið Welding

Mannanöfn

Tengdar fréttir

Annþór fær grænt ljós hjá mannanafnanefnd

Mannanafnanefnd hefur samþykkt beiðni þess efnis að eiginnafnið Annþór verði fært á mannanafnaskrá. Þetta kemur fram í nýlegum úrskurði mannanafnanefndar.

24. ágúst 2021 10:15

Fær loksins að heita Kona

Mannanafnanefnd samþykkti nýverið kvenkynseiginnafnið Kona og hefur það verið fært á mannanafnaskrá. Áður hafði nafninu verið hafnað með þeim rökum að það bryti í bága við íslenskt málkerfi en farið var fram á endurupptöku.

22. ágúst 2021 15:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.