Í fyrsta skipti sem England vinnur fyrsta leik á Evópumóti

England og Króatía áttust við í fyrsta leik dagsins á Evrópumótinu í knattspyrnu í dag. Mark Raheem Sterling á 57.mínútu reyndist eina mark leiksins og það voru því Englendingar sem fóru með 1-0 sigur af hólmi.

Eins og allir leikir Englands í riðlinum fór viðureign þeirra gegn Króatí fram á Wembley, þjóðarleikvangi Englendinga.

Þeir ensku byrjuðu betur og Phil Foden var ansi nálægt því að koma þeim yfir strax á sjöttu mínútu. Þá fékk hann sendinu inn fyrir frá Raheem Sterling, en skot hans hafnaði í innanverðri stönginni.

Króatar náðu að hægja á sóknarleik Englendinga um miðjan fyrri hálfleik og nokkuð jafnræði ríkti þar til flautað var til hálfleiks.

Á 57.mínútu leit opnunarmark leiksins loksins ljós. Kalvin Phillips fékk þá boltann á miðjum vallarhelmingi Króata og frábær stungusending hans fann Raheem Sterling inni í teig Króata. Sterling gerði virkilega vel og kom boltanum fram hjá Dominik Livakovic í marki Króata.

Á 82. mínútu kom Bellingham inn af varamannabekk Englendinga fyrir fyrirliða liðsins, Harry Kane. Bellingham varð þar með yngsti leikmaður sögunnar til að spila leik á Evrópumóti, aðeins 17 ára og 349 ára gamall.

Hvort sem þið trúið því eða ekki þá er þetta er í fyrsta skipti sem England vinnur opnunarleik sinn á Evrópumeistaramóti.

Næsti leikur Króata er gegn Tékkum næstkomandi föstudag klukkan 16:00 áður en Englendingar mæta nágrönnum sínum, Skotum, klukkan 19:00 sama dag.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.