Belgar og Englendingar líklegastir til að vinna EM

Íþróttatölfræðiveitan Gracenote hefur reiknað út hvaða lið eru líklegust til að vinna EM. Mótið virðist samkvæmt þeim útreikningum vera galopið og ekkert lið með afburðum sigurstranglegast.

Belgía, sem er efst á heimslista FIFA, þykir örlítið líklegra en England til að vinna mótið. Gracenote metur sigurlíkur hvorrar þjóðar hæstar allra, eða um 14%. Frakkland (12%), Spánn (10%), Ítalía (9%) og Portúgal (8%) koma næst.

Belgar freista þess að vinna sitt fyrsta stórmót og eina stórmótið sem Englendingar hafa unnið var á heimavelli á HM 1966. England verður á heimavelli í sínum riðli á EM, þar sem liðið mætir Króatíu, Skotlandi og Tékklandi, og gæti mögulega einnig leikið á Wembley í 16-liða úrslitum, undanúrslitum og úrslitum.

Samkvæmt Gracenote eru mestar líkur á að England og Belgía mætist í úrslitaleik EM, en þó aðeins um 2,9% líkur. Næstmestar líkur eru á að England og Ítalía mætist í úrslitum, eða Danmörk og Belgía.

Danir leika á heimavelli í B-riðli, með Belgum, Finnum og Rússum. Gracenote telur yfir 90% líkur á að Danmörk fari áfram úr riðlinum, sem og að Belgar fari upp úr riðlinum. Tölfræðiveitan segir einnig yfirgnæfandi líkur á því að Spánn, England, Holland og Ítalía fari áfram úr sínum riðlum.