Hraunið byrjað að banka upp á báða varnargarðana

Í fréttum Stöðvar 2 mátti sjá jarðýtu og skurðgröfu á lokametrunum að byggja upp eystri varnargarðinn í Meradal syðri í dag.

„Það gengur alveg ljómandi vel, eins og þú sérð. Við erum alveg að nálgast það að komast upp í fjóra metrana,“ sagði Hörn Hrafnsdóttir, umhverfis- og byggingarverkfræðingur hjá Verkís, sem stýrði gerð varnargarðanna á staðnum í dag.

Hraunrennslið frá gígnum í dag var til þriggja átta; inn í Meradalina báða en einnig inn í Geldingadali.

„Hraunið er að streyma fram. Það er að byggja upp þrýsting. Svo er þetta bara spurning hvar þetta finnur veikleika hverju sinni.“

Vestanmegin í dalnum er hraunið þegar farið að hrynja yfir fyrsta neyðargarðinn og byrja að banka upp á báða garðana.

„Já, það er algerlega farið að banka upp á. Við máttum ekki byrja seinna en við gerðum,“ segir Hörn.

En menn vilja veigameiri garða og í dag lögðu Almannavarnir til að farið yrði með þá upp í átta metra hæð. Starfshópur ráðuneytisstjóra um vernd innviða vegna eldgossins á lokaorðið á fundi í fyrramálið.

„Ef það kemur grænt ljós þá á morgun þá býst ég við að það verði bara byrjað á því annaðhvort á morgun eða hinn.“

Einar Jónsson ýtustjóri vill ennþá stærri garða.

„Tuttugu metra í viðbót.“

-En heldurðu að hraunið muni ekki á endanum fara yfir samt sem áður og sigra mannanna verk?“

„Þá er bara að byrja aftur. Halda áfram upp,“ svarar Einar og hlær.

„Þetta mun alveg örugglega tefja fyrir hrauninu. En hversu lengi.. - það er svolítið tilraunakennt hvað þetta heldur lengi,“ segir Hörn.

Þetta sé þó innlegg í reynslubankann.

„Ef þetta gengur eftir, sem okkar fræðingar segja, að nú sé Reykjanesið vaknað, þá kannski vitum við aðeins meira um hvernig á að bregðast við þegar þetta kemur aftur upp á fleiri stöðum,“ segir Hörn.

Ekki er að sjá neitt lát á gosinu. Kvikustrókar fara hátt til himins með miklum drunum en þess á milli dettur allt niður í dúnalogn. Takturinn í gígnum er eiginlega furðujafn. Hann er að gjósa á þetta fimm til átta mínútna fresti, rétt eins og goshverinn Strokkur.

„Svo er að brotna úr gígnum hérna vinstra megin, það gerði það í gær,“ segir Einar ýtustjóri.

Hann er sannarlega á ævintýralegum vinnustað þessa dagana, vinnandi í kappi við hraunrennslið með eldspúandi gíginn í bakgrunni.

„Þetta er flottur vinnustaður,“ segir hann.

-Þú hefur aldrei verið í svona áður?

„Nei, ekki svona,“ svarar hann og hlær.“

Hér má sjá frétt Stöðvar 2:

Hér má sjá eldgosið í beinni útsendingu Vísis: