Fótbolti

Kvennalið Selfoss fær hina norsku Håland í markið hjá sér

Óskar Ófeigur Jónsson skrifar
Benedicte Håland hefur leikið fyrir yngri landslið Noregs.
Benedicte Håland hefur leikið fyrir yngri landslið Noregs. Instagram/@selfossfotbolti

Topplið Selfoss í Pepsi Max deild kvenna í fótbolta hefur fengið liðstyrk fyrir sumarið.Knattspyrnudeild Selfoss hefur samið við norska markvörðinn Benedicte Håland um að leika með liði félagsins í sumar en þetta kemur fram á miðlum félagsins.

Håland er 23 ára gömul og kemur til Selfoss frá Bristol City í ensku úrvalsdeildinni. Áður lék hún með liðum Sandviken og Arna-Bjørnar í norsku úrvalsdeildinni. Hún á að baki átta landsleiki með yngri landsliðum Noregs.

Guðný Geirsdóttir hefur staðið í marki Selfoss í fyrstu tveimur leikjunum og hefur haldið hreinu í þeim báðum.

Þýski markvörðurinn Anke Preuss átti að standa í markinu í sumar en hún fingurbrotnaði rétt fyrir mót og er frá í tvo mánuði.

„Við erum að fá fínasta markmann þarna í samkeppni við Guðnýju sem er búin að standa sig gríðarlega vel í fyrstu leikjunum. Það er mikilvægt fyrir okkur að hafa samkeppni um markmannsstöðuna eins og aðrar stöður. Við erum spennt að fá Benedicte til okkar, hún er hávaxin og sterk með góða reynslu og kemur til með að efla hópinn okkar enn frekar,“ segir Alfreð Elías Jóhannsson, þjálfari Selfoss í viðtali á fésbókarsíðu Selfoss.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.