Tíska og hönnun

Heilaga þrenningin fyrir heilbrigða húð

Sylvía Rut Sigfúsdóttir skrifar
Jenna Huld heimsótti Heiði Ósk og Ingunni Sig í HI beauty hlaðvarpið.
Jenna Huld heimsótti Heiði Ósk og Ingunni Sig í HI beauty hlaðvarpið. Samsett

Þegar valin er húðrútína þarf að taka inn í jöfnuna hvernig húðin er og hvort það séu einhver vandamál til staðar.

„Það þarf að sníða húðrútínuna eftir hverjum og einum,“ segir Jenna Huld Eysteinsdóttir sérfræðingur í húð- og kynsjúkdómalækningum. Hún var gestur í HI beauty hlaðvarpinu hjá þeim Ingunni Sig og Heiði Ósk og ræddi þar um ýmislegt tengt húð og húðmeðferðum.

„Það ber að varast að taka upp húðrútínu frá einhverjum öðrum því þeir eru náttúrulega bara að tala út frá sjálfum sér.“

Hún ítrekar að öll erum við með mismunandi húð og því er kannski ekki ráðlegt að fylgja í einu og öllu húðrútínu sem maður sér á TikTok. Hún segir að það séu samt ákveðnar húðvörur sem hún mælir með í húðrútínuna.

„Almennt er það að hreinsa húðina. Heilaga þrenningin er þá sólarvörn og C-vítamín eða andoxunarefni og svo Retinol. Það er svona mest húðverndandi og stuðlar að heilbrigði húð eins lengi og við mögulega getum.“

Jenna Huld segir að það þurfi samt að hafa huga að alls ekki allir þola Retinol.

Hægt er að hlusta á þáttinn í heild sinni í spilaranum hér fyrir neðan. Hún ræðir þar einnig um hreinsun, raka, bólur, öldrun húðarinnar og nokkrar mýtur í húðumhirðu. Einnig talar hún húðmeðferðir, hverjar virka og hverjar ekki og margt fleira.

Klippa: HI beauty hlaðvarp - Jenna Huld Eysteinsdóttir

Meirihlutinn fær bólur

Þær Heiður Ósk og Ingunn Sig báðu Jennu Huld meðal annars að svara því af hverju fólk fær bólur. Hún segir að bólur séu tvenns konar. Hægt er að fá bólur út frá því að húðin stíflist eða lokast of mikið, maður fær þær einstaka sinnum og koma þær og fara.

„Síðan erum við með bólusjúkdóminn eða acne. 80 til 90 prósent einstaklinga upplifa acne einhvern tímann á lífsleiðinni, oftast í kringum kynþroskann vegna hormóna aukningar sem eykur fituframleiðslu í líkamanum.“

Oft eru bólusjúkdómar líka í fjölskyldunni. Margar lausnir eru í boði ef bólur eru alvarlegt vandamál og fer hún yfir það í viðtalinu. Umræðan um bólur hefst á mínútu 52 í þættinum.

Sólarvörnin besta hrukkukremið 

Jenna Huld er einnig spurð um hrukkur og helstu ástæður ótímabærrar öldrunar húðarinnar.

„Það sem flýtir fyrir öldrun, þar er sólin númer eitt, tvö og þrjú. Útfjólubláu geislarnir í sólinni bæði brjóta niður kollagenið og valda frumu skemmdum í húðinni. Besta anti-aging kremið sem þú getur mögulega keypt þér er því sólarvörn.“

Jenna Huld segir að það sé þó fleira sem skipti máli. Eins og lífernið

„Reykingar, mikil streita og svefn hefur mikið að segja. Heilbrigt líferni hefur náttúrulega betri áhrif á öldrun húðarinnar.“


Tengdar fréttir

Stjörnurnar sem skinu skærast á rauða dreglinum

Óskarsverðlaunin voru afhent í 93. skipti í gær. Það voru margar stjörnur sem vöktu mikla athygli á rauða dreglinum og fengum við Ingunni Sig og Heiði Ósk okkar í HI beauty til þess að taka saman það sem stóð upp úr að þeirra mati.

Spá þessum trendum mest áberandi árið 2021

Í nýjum þætti af hlaðvarpinu HI Beauty fóru þær Ingunn Sig og Heiður Ósk yfir trendin sem þær spá því að taki yfir förðunar- og snyrtivöruheiminn og fatatískuna í ár.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.