Enski boltinn

Liver­pool skotið 115 sinnum í opnum leik án þess að skora

Runólfur Trausti Þórhallsson skrifar
Mo Salah er eini leikmaður Liverpool til að skora á Anfield í síðustu sex leikjum. Markið kom úr vítaspyrnu í 1-4 tapi gegn Manchester City.
Mo Salah er eini leikmaður Liverpool til að skora á Anfield í síðustu sex leikjum. Markið kom úr vítaspyrnu í 1-4 tapi gegn Manchester City. EPA-EFE/Laurence Griffiths

Liverpool tekur á móti Aston Villa í ensku úrvalsdeildinni á morgun. Heimavallargengi Englandsmeistaranna hefur verið vægast sagt skelfilegt að undanförnu.

Liverpool tapaði illa fyrir Real Madrid í 8-liða úrslitum Meistaradeildar Evrópu í vikunni en það sem meira er þá hefur liðinu gengið hreint út sagt skelfilega á Anfield undanfarnar vikur. Liðið hefur nefnilega tapað sex leikjum í röð á heimavelli.

Af síðustu 11 leikjum liðsins í ensku úrvalsdeildinni hefur liðið unnið fimm og tapað sex. Fimm sigurleikir á útivelli en sex töp á heimavelli. Það sem meira er, Liverpool hefur aðeins skorað eitt mark í leikjunum sex.

Það kom af vítapunktinum í 1-4 tapi gegn Manchester City þann 7. febrúar. Ef vítaspyrna Mo Salah þann daginn er tekin út úr jöfnunni þá hefur Liverpool skotið 115 sinnum í átt að marki án þess að skora í leikjunum sex.

Síðast þegar Liverpool og Aston Villa mættust þá vann Villa ótrúlegan 7-2 sigur. Endurtaki þeir leikinn á morgun þá jafnar Liverpool met Huddersfield Town frá 2019 er liðið tapaði sjö heimaleikjum í röð.

Villa hefur staðið sig vel á útivöllum á leiktíðinni en ekkert lið hefur haldið marki sínu oftar hreinu heldur en lærisveinar Dean Smith. Það má því reikna með hörkuleik á Anfield á morgun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.