Lögreglan á Austurlandi fékk tilkynningu um að beinunum hafi skolað á land snemma í morgun. Kristján Ólafur vill ekki tjá sig um málið að svo stöddu en segir að það sé í rannsókn og að ekki leiki grunur á að nokkuð saknæmt hafi átt sér stað. 

Ekki hafa verið borin kennsl á beinin. Lögreglan mun senda frá sér tilkynningu vegna málsins síðar í dag. 

Uppfært klukkan 15:25:

Eftirfarandi fréttatilkynning var að berast frá embætti lögreglustjórans á Austurlandi vegna málsins: 

„Um klukkan hálf ellefu í morgun barst lögreglu tilkynning um bein í fjöru við Vopnafjörð. Talið var að um mannabein væri að ræða. Lögregla hefur síðan verið að störfum á vettvangi við vettvangsrannsókn.

Staðfest hefur verið að um líkamsleifar er að ræða og talið að þær hafi legið í sjó í nokkurn tíma. Þær munu nú sendar til frekari rannsóknar þar sem kennslanefnd Ríkislögreglustjóra freistar þess að staðfesta kennsl þeirra.

Ekki leikur grunur á að líkfundur þessi tengist saknæmu atviki.“