58 látnir eftir árás víga­manna í Níger

58 manns hið minnsta létu lífið í árásinni, en fólkið var á leið heim til þorpanna Chinedogar og Darey-Daye þegar árásarmennirnir létu til skarar skríða. Auk þess að stráfella fólkið brenndu árásarmennirnir nokkur farartæki og nálægar korngeymslur.

AFP hefur eftir sjónarvottum að árásarmennirnir hafi fyrst ráðist á fólk í rútu þar sem um tuttugu manns voru skotnir til bana. Þá var mikill fjöldi sömuleiðis drepinn á markaðnum í Banibangou.

Enginn hefur enn lýst yfir ábyrgð á árásinni, en síðustu ár hafa íslamskir vígahópar verið skæðir í þessum heimshluta.

Ríkisstjórn Níger hefur lýst yfir þriggja daga þjóðarsorg vegna árásarinnar.