Lífið

Henti eiginmanninum út og breytti hrútakofanum í vinnustofu

Sylvía Rut Sigfúsdóttir skrifar
Kristín Helga Gunnarsdóttir segir að þau hjónin kalli smáhýsið sitt hof og móðgist því ef fólk kalli það kofa eða skúr.
Kristín Helga Gunnarsdóttir segir að þau hjónin kalli smáhýsið sitt hof og móðgist því ef fólk kalli það kofa eða skúr. Ísland í dag

Pínulítil íbúðarhús alveg niður í 13 fermetra hafa þvílíkt slegið í gegn að undanförnu og Vala Matt hefur skoðað nokkur ævintýralega skemmtileg fyrir Ísland í dag.

 Í þættinum í gær kíkti hún í heimsókn í þrettán fermetra íbúðarhús á hjólum og annað fimmtán fermetra íbúðarhús sem er enn í smíðum.

Að þessu sinni fór Vala í leiðangur í Garðabæinn og skoðaði lítið hús í bakgarði byggt úr rekaviðardrumbum sem er mjög sérstakt. Rithöfundurinn margverðlaunaði Kristín Helga Gunnarsdóttir hefur notað húsið til að skrifa nokkrar af sínum snilldar bókum og einnig hefur það verið notað sem íbúðarhús.

„Maðurinn minn er algjör smíðameistari og hefur ótrúlega gaman að smíða,“ segir Kristín Helga. Hún segir að mörg handtök og mikil ást hafi verið lögð í húsið og því skuli það frekar kallað hof heldur en kofi eða skúr.

„Það eru átta drumbar í þessu húsi og þeir eru ýmist keyptir eða stolnir,“ útskýrir Kristín Helga. Rekaviðurinn í húsinu kemur að hluta frá fjörunni á Suðurnesjum. Hún segir að sér detti ekki í hug að lakka eða mála svona flottan rekavið. Í byrjun var smáhýsið vinnustofa eiginmannsins.

„Svo fékk hann að vera hérna í nokkur ár og leið afar vel en hann vinnur um allan bæ á meðan ég er alltaf heima. Hægt og bítandi breytti hann þessu í einhvers konar gym og þetta varð einhver hrútakofi, mér leist ekkert á. Mér fannst þetta bara ekki nógu huggulegt þannig að ég tók þetta yfir, ég henti honum út.“

Kristín Helga er einnig snillingur að flísaleggja með flísum sem hún iðulega býr til sjálf. Bæði gólf, veggi, gluggakistur og borð sem eru alveg ævintýraleg. Sýnt er frá því í þættinum sem má horfa á í heild sinni hér fyrir neðan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.