Innlent

Kæmi ekki á óvart þótt fastagestir fagni með því að taka lagið

Margrét Helga Erlingsdóttir skrifar
Þessi ljósmynd var tekin í byrjun sumars árið 2019 og er af Götubarnum og göngugötunni á Akureyri.
Þessi ljósmynd var tekin í byrjun sumars árið 2019 og er af Götubarnum og göngugötunni á Akureyri. Vísir/Vilhelm

Kráareigendur mega nú opna staði sína á ný eftir marga mánaða lokun. Einum af eigendum Götubarsins á Akureyri kæmi hreint ekki á óvart þótt einhver fastagestanna fagnaði opnun staðarins með því að spreyta sig á vel sótthreinsuðum flygli.

Áfram verður almennt miðað við tuttugu manna samkomubann, tveggja metra regluna og grímuskyldu. Þrátt fyrir góðan árangur í baráttunni gegn kórónuveirunni innanlands hafa sóttvarnayfirvöld sagst vilja stíga varfærin skref í átt að opnun í ljósi nýrra afbrigða veirunnar og mikillar útbreiðslu hennar í löndunum í kringum okkur.

Aron Elí Gíslason, einn eigenda Götubarsins á Akureyri, er hæstánægður með að geta opnað að nýju eftir margra mánaða lokun. Staðurinn verður opnaður fyrir gestum næsta fimmtudag klukkan fimm.

„Eftir fjóra erfiða mánuði þar sem við þurftum að hafa lokað, þá erum við hrikalega ánægð að geta opnað og höldum að fram undan séu bjartir tímar. Vonandi var þetta síðasta lokunin hjá okkur í bili. Það verður bara hrikalega gott að fá fólk í húsið og að starfsfólkið geti fengið að vinna aftur. Við erum mjög jákvæð gagnvart framhaldinu.“

Aron er sannfærður um að gestum götubarsins líði eins. Staðurinn verður opnaður á ný næsta fimmtudag klukkan 17.00.

„Ég hugsa að margir gestir hafi saknað þess að geta farið á Götubarinn og fengið sér smá vín. Ég hugsa að það verði ágætt að gera hjá okkur og að þeir sem elski Götubarinn láti sjá sig.“

Það kæmi Aroni hreint ekki á óvart þótt einhver muni taka lagið á fimmtudaginn enda er staðurinn landsþekktur fyrir að vera hálfgerður tónlistarbar þar sem gestir geta látið ljós sitt skína á flyglinum.

„Við erum með tvo flygla hérna og oftar en ekki er nú einhver sem heldur uppi stemningunni þannig að ég held að það verði engin breyting á því núna um helgina.“

Þrátt fyrir að ráðist hafi verið í varfærnar tilslakanir þarf eftir sem áður að gæta vel að sóttvörnum. Aron segir að hugsað hafi verið fyrir öllu og að starfsfólk verði tilbúið í að taka á móti gestum á fimmtudag.

„Við búum svo vel að geta skipt staðnum alveg upp í tvö hólf og við ætlum að nýta það og passa að allir starfsmenn verði með grímur og við munum þjóna til borðs og passa upp á að það verði einungis tuttugu manns á staðnum með starfsfólki. Við fylgjum öllum reglum og þrífum alla snertifleti vel.“


Tengdar fréttir

Þessar breytingar á sam­komu­banni tóku gildi á mið­nætti

Ný reglu­gerð heil­brigðis­ráð­herra um sam­komu­tak­markanir vegna kórónu­veirufar­aldursins tók gildi á mið­nætti en í breytingunum felst meðal annars að krám, skemmti­stöðum og spila­kassa­sölum verður heimilt að opna á ný að upp­fylltum skil­yrðum.

Prestar og kráareigendur taka gleði sína á ný

Heilbrigðisráðherra kynnti nýjar tilslakanir á sóttvarnareglum í gær en meðal stærstu breytinga sem taka gildi á mánudag er að krám og skemmtistöðum verður aftur leyft að opna til klukkan 22 á kvöldin. Þar að auki verður 150 fullorðnum einstaklingum leyft að vera viðstaddir athafnir í kirkjum og hjá öðrum trúfélögum.

Krár og skemmtistaðir fá að hafa opið til klukkan 22

Krár, skemmtistaðir og spilakassasalir mega frá og með mánudeginum 8. febrúar hafa opið til klukkan 22 á kvöldin eins og veitingastaðir. Fjöldatakmörk í sviðslistum, útförum og fleira aukast úr 100 í 150. Þá fá fleiri að sækja líkamsræktarstöðvar. Áfram er tveggja metra regla í landinu og almennt miðað við tuttugu manna samkomubann.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×