Sarah Sanders vill verða næsti ríkis­stjóri Arkansas

Mike Huckabee, faðir Sanders, gegndi embætti ríkisstjóra Arkansas á árunum 1996 til 2007. Hann sóttist eftir að verða forsetaefni Repúblikana bæði 2008 og 2016.

Hin 38 ára Sanders var einn helsti talsmaður og ráðgjafi Trumps, þáverandi Bandaríkjaforseta, en hætti störfum í Hvíta húsinu árið 2019 og sneri þá aftur til heimaríkis síns, Arkansas. Hún var mikið gagnrýnd í tíð sinni sem talskona Trump fyrir að hafa ítrekað borið lygar forsetans á borð.

Repúblikanaflokkurinn hefur alla jafna verið sterkur í Arkansas og þannig naut Trump mikilla vinsælda í ríkinu.

Sanders mun í forvali Repúblikanaflokksins meðal annars kljást við Tim Griffin aðstoðarríkisstjóra (e. lieutenant-governor) og Leslie Rutledge, dómsmálaráðherra ríkisins, um útnefninguna.

Nýr ríkisstjóri mun taka við af Asa Hutchinson sem er óheimilt að bjóða sig fram að nýju á næsta ári, eftir að hafa gegnt í embættinu frá 2015.