Leið vel að vera kominn í Valstreyjuna

Patrick Pedersen, sóknarmaður Vals, er leikmaður fjórðu umferðar Pepsi-deildar karla að mati Fréttablaðsins en hann er nýkominn aftur til Valsmanna eftir að hafa slegið í gegn á Hlíðarenda á síðari hluta tímabilsins í fyrra.

Þá skoraði hann fimm mörk í níu leikjum og var þá lánsmaður frá Vendsyssel í heimalandinu. Fyrir tæpri viku, á lokadegi félagaskiptagluggans, var skyndilega tilkynnt að Valur hefði komist að samkomulagi við félagið um kaup á Pedersen og kom hann hingað til lands um helgina.

Magnús Gylfason, þjálfari Vals, setti Pedersen beint í byrjunarliðið og þakkaði hann fyrir sig með því að skora tvö mörk í 5-3 sigri liðsins á Val.

„Þetta var frábær byrjun og gott fyrir mig enda hafði ég ekki spilað leik í byrjunarliði í meira en mánuð,“ sagði Pedersen í samtali við Fréttablaðið í gær.

Vil skora fullt af mörkum

„Mér leið vel að vera kominn aftur í Valstreyjuna. Ég vona bara að við höldum áfram á þessari braut en til þess þurfum við að bæta varnarleikinn. Það var frábært að skora fimm mörk í þessum leik en að sama skapi gengur ekki að fá þrjú mörk á okkur í hverjum leik.“

Hann hefur metnað til að standa sig vel í deildinni í sumar en veit ekki hvað tekur við að tímabilinu loknu.

„Ég vona að okkur takist að vera á meðal þriggja efstu liðanna í deildinni og að ég muni skora mikið af mörkum. Það eru þó bara fjórar umferðir búnar enn sem komið er og næsta verkefni er leikur gegn Stjörnunni á fimmtudag [á morgun]. Það verður erfiður leikur,“ bætir Pedersen við.

Hann telur að Valsliðið sé betur skipað en í fyrra. „Það eru nokkrir nýjir leikmenn komnir og það er góð blanda af Íslendingum og erlendum leikmönnum í hópnum,“ segir hann.

Vildi fá að spila meira

Pedersen er 22 ára gamall og segir ástæðu þess að hann hafi tekið tilboði Vals að hann hafi viljað spila meira.

„Ég var í byrjunarliðinu í fyrstu tveimur leikjunum [hjá Vendsyssel] í vetur en svo á bekknum. Ég er því ánægður með að vera kominn til Vals en hvað gerist svo í framtíðinni verður bara að koma í ljós. Ég einbeiti mér fyrst að þessu tímabili með Val.“

Sem fyrr segir kom hann með skömmum fyrirvara til landsins og deilir hann fyrst um sinn íbúð með þeim Matarr Jobe og Lucas Ohlander.

„Ég er með lítið herbergi hjá þeim og slepp því við að sofa á dýnu á gólfinu,“ sagði hann í léttum dúr. „En ég vona að íbúðin mín verði tilbúin eftir nokkra daga.“