Kanadísku stelpurnar tryggðu sér bronsið í uppbótartíma

Miðjumaðurinn Diana Matheson tryggði kanadíska landsliðnu bronsið í fótboltakeppni kvenna á Ólympíuleikunum í London í dag þegar hún skoraði eina markið í leiknum um þriðja sætið á móti Frökkum.

Kanadíska liðið tapaði á grátlegan hátt í lok framlengingarinnar á móti Bandaríkjunum í undanúrslitunum en nú var komið að þeim að skora sigurmark í blálokin.

Diana Matheson hafði heppnina með sér í sigurmarkinu þegar skot félaga hennar Sophie Schmidt hrökk af varnarmanni og fyrir fætur hennar í vítateignum.

Þetta eru fyrstu verðlaun Kanadamanna í hefðbundni liðsíþrótt á Ólympíuleikum síðan að körfuboltalið þjóðarinnar vann silfur á ÓL í Berlín 1936.

Frönsku stelpurnar voru sterkari í seinni hálfleiknum, Gaetane Thiney skaut í stöngina á 62. mínútu og Elodie Thomis skaut í slánna stuttu síðar. Kanadískur varnarmaður bjargaði líka á línu en inn vildi boltinn ekki.

Bandaríkin og Japan spila um gullið seinna í kvöld.