Lineker talaði um það þegar hann gerði í brækurnar í miðjum leik á HM á Ítalíu

Fótboltaleysið dregur ýmislegt fram í dagsljósið og fær marga til að rifja upp alls kyns sögur frá ferlinum. Enska knattspyrnugoðsögnin og þáttastjórnandinn Gary Lineker var meira segja tilbúinn að ræða vandræðalegasta augnablikið á ferlinum.

Gary Lineker ræddi það í hlaðvarpsþætti „Match of the Day“ þegar hann gerði í brækurnar í miðjum leik með enska landsliðinu og það sjálfu á heimsmeistaramótinu.

Þetta var fyrsti leikur enska landsliðsins á HM á Ítalíu 1990 og var á móti Írum í Cagliari.

Gary Lineker hafði verið veikur og var með niðurgang nóttina fyrir leikinn. Hann vildi samt ekki láta landsliðsþjálfarann vita af ótta um að missa sæti sitt í liðinu.

Lineker áttaði sig á því eftir tíu til fimmtán mínútur í síðari hálfleik að maginn hans ætlaði að vera til enn frekari vandræða.

„Ég hafði verið veikur um nóttina og hafði vaknað nokkrum sinnum með niðurgang. Ég sagði ekki Bobby Robson frá þessu því ég vildi spila og var hræddur um að hann tæki mig út úr liðinu,“ sagði Gary Lineker.

„Leikurinn fór af stað og það var allt í góðu til að byrja með. Eftir tuttugu mínútur fór ég að finna fyrir magaverkjum. Ég náð samt einhvern veginn að komast í gegnum fyrri hálfleikinn,“ sagði Lineker.

„Ég byrja síðan seinni hálfleikinn en eftir tíu til fimmtán mínútur þá fékk ég magakrampa á ný. Ég hugsaði: Nú er ég í vandræðum,“ sagði Lineker.

„Svo kom að því að ég renndi mér í grasið og reyndi að komast fyrir boltann. Ég fór í jörðina, slakaði á í smástund og það varð sprenging,“ sagði Lineker.

„Ég hugsaði: Guð minn góður. Þetta var líka út um allt. Ef þið horfið á upptökuna þá má sjá þegar Gary Stevens kemur til mín og spyr mig hvað sé að: Ég sagði honum að ég hefði skitið á mig, sagði Gary Lineker.

„Ég vissi ekki hvað ég átti að gera en ég þakka guði að hafa verið í svörtum buxum þennan daginn. Ég reyndi að skófla þessu út og þurrkaði mér í grasið eins og hundur,“ sagði Lineker.

„Það var magnað hvað ég fékk mig pláss eftir þetta því ég lyktaði auðvitað mjög illa. Á endanum varð Bobby að taka mig af velli, sagði Lineker en hann slapp þó ekki á klósettið alveg strax.

„Á flestum völlum eru varamannabekkirnir vanalega við leikmannagöngin en á þessum velli voru þeir aftur á móti hinum megin. Ég þurfti því að klára leikinn á bekknum með öllum hinum varamönnunum,“ sagði Lineker.

„Það má sjá alla varamennina reyna að koma sér í burtu frá mér á meðan ég sat einn og yfirgefinn að vorkenna sjálfum mér,“ sagði Lineker.

Gary Lineker skoraði alls fjögur mörk á mótinu og enska liðið fór alla leið í undanúrslitin þar sem liðið tapaði í vítakeppni á móti verðandi heimsmeisturum Þýskalands.