Hiddink boðið starf hjá Chelsea

Guus Hiddink hefur greint frá því að honum hefur verið boðið ráðgjafastarf hjá Chelsea eftir að hann hættir sem knattspyrnustjóri liðsins í vor.

Hiddink er einnig landsliðsþjálfari Rússa og mun einbeita sér að því að koma liðinu á HM í Suður-Afríku að tímabilinu loknu í Englandi.

„Þeir hafa beðið mig um að starfa áfram fyrir félagið sem ráðgjafi eftir að samningurinn rennur út," sagði Hiddink í samtali við enska fjölmiðla. „Kannski að ég geti reynst Chelsea gagnlegur í slíku hlutverki," bætti hann við.

Chelsea hefur unnið sjö af fyrstu átta leikjum sínum undir stjórn Hiddink og hafa nokkrir leikmanna Chelsea, til að mynda Michael Ballack og Petr Cech, hvatt Hiddink til að halda áfram sem stjóri liðsins.

Svo virðist sem að það sé möguleiki á að svo verði eftir að framkvæmdarstjóri rússneska knattspyrnusambandsins sagðist vera reiðbúinn að ræða það að leyfa Hiddink að sinna áfram báðum störfum á næsta tímabili eins og hann hefur gert nú.