Pollapönkarar biðjast afsökunar

Hljómsveitin Pollapönk baðst í dag afsökunar á auglýsingu sem þeir léku í fyrir Olís. Auglýsingin beinist til barna og í felst í henni bein hvatning til þeirra um að kaupa auglýsta vöru samkvæmt áliti Neytendasamtakanna.

Í auglýsingunni segir Heiðar Örn Kristjánsson söngvari hljómsveitarinnar að á Olís fáist sérstakur Pollaís.

„Plís, getum við fengið okkur Pollaís á Olís?“ segja allir meðlimir hljómsveitarinnar í kór.

DV vakti athygli á málinu og í áliti Neytendasamtakanna segir að samtökin telji ljóst að með auglýsingum og leikjum af þessu tagi eru fyrirtæki að nýta börn til að beina foreldrum í viðskipti við ákveðin fyrirtæki. Slíkt sé að mati samtakanna afar ósmekklegt.

Pollapönkarar segjast taka þeim afleiðingum sem birting auglýsingarinnar hafði í för með sér.

„Við höfum aldrei og munum aldrei verða fullkomnir hvorki sem heild né sem einstaklingar. Við munum hins vegar gera allt til þess að læra af þessum mistökum,“ segir í afsökunarbeiðni þeirra.