Nýtt tímarit um heimili og mat

„Íslendingar hafa alltaf hugsað vel um heimili sín og þeim þykir mörgum gaman að elda,“ segir innanhúshönnuðurinn Halla Bára Gestsdóttir en hún og eiginmaður hennar, Gunnar Sverrisson ljósmyndari, vinna nú að stofnun nýs veftímarits um heimili og mat.

Tímaritið ber nafnið Home & Delicious en efnistök blaðsins eru heimili, matur og allt sem því fylgir. Tímaritið verður gefið út bæði á íslensku og ensku. Íslenskur bragur verður þó að á blaðinu þar sem verður allt frá innlitum inn á íslensk heimili og uppskriftum með íslensku hráefni. „Netið er lifandi miðill sem býður upp á óteljandi möguleika og við finnum að það er áhugi fyrir blaði á borð við þetta. Við vinnum mestallt efnið sjálf og verðum með fjölbreytta flóru.“

Halla Bára og Gunnar eru alls ekki ókunnug fjölmiðlum en þau stofnuðu og ritstýrðu blöðunum Lifun og Veggfóðri. „Svo fluttum við til Ítalíu þar sem ég lærði innanhúshönnun en var alltaf með það á bak við eyrað að beina sjónum mínum að skrifum á þessum vettvangi. Það var svo fyrst í vor sem við settumst niður og ákváðum að taka upp þráðinn að nýju eftir að hafa velt þessu fyrir okkur í vetur,“ segir Halla Bára en fyrsta tölublað Home and Delicious kemur út í júní.

Þangað til verður hægt að fylgjast með Höllu Báru og Gunnari á bloggsíðunni Homeanddelicious.com þar sem þau deila ýmsum hugmyndum varðandi heimili og mat en á þeirri síðu verður einnig hægt að nálgast blaðið. -áp