Nýnasistar boða dag hefndar

Um fimm þúsund þýskir nýnasistar fóru í göngu í Dresden í gær til að minnast þess að 60 ár voru liðin frá því 35 þúsund manns létu lífið í loftárásum bandamanna á borgina undir lok síðari heimsstyrjaldar. Göngumenn héldu á kyndlum og spiluðu tónlist Richard Wagners, uppáhaldstónskálds Adolfs Hitler, og héldu á borðum með áletrunum eins og "Sprengjuhelför" og "Dagur hefndar kemur". Gerhard Schröder, kanslari Þýskalands, var ósáttur við göngu nýnasistanna og sagði Þjóðverja myndu berjast gegn hvers konar tilraunum til að endurrita söguna og sagði sprengjuárásirnar afleiðingu af stríðsrekstri nasista.