Alan Shearer er ennþá bjartsýnn þrátt fyrir tap

Alan Shearer, stjóri Newcastle, hefur enn fulla trú á því að hann geti bjargað Newcastle frá falli úr ensku úrvalsdeildinni þrátt fyrir 0-2 tap í fyrsta leiknum á móti Chelsea í dag.

Newcastle hélt hreinu í fyrri hálfleik en fékk á sig tvö mörk með níu mínútna millibili í seinni hálfleik.

„Ég er ennþá bjartsýnn. Ég hef fulla trú á því að við getum bjargað okkur frá falli og það sem er enn mikilvægara, mínir leikmenn hafa fulla trú á því líka," sagði Shearer. „Einn fótboltaleikur tekur langan tíma og við eigum eftir sjö til viðbótar," sagði Shearer.

„Það verða örugglega sveiflur í þessu hjá okkur en auðvitað voru úrslit annarra leikja í dag okkur óhagstæð líka. Við erum samt enn með í baráttunni og við ætlum að ekkert að gefa neitt eftir í henni," sagði Shearer.

Newcastle er í þriðja neðsta sæti með 29 stig og er liðið þremur stigum á eftir Sunderland sem situr nú í síðasta örugga sætinu í deildinni.