Cantona kærir New York Cosmos

Eric Cantona er farinn í mál við bandaríska fótboltaliðið New York Cosmos.

Cantona, sem starfaði sem yfirmaður knattspyrnumála hjá félaginu, telur að NY Cosmos skuldi sér eina milljón dollara vegna ógreiddra launa.

Cantona var sagt upp störfum hjá félaginu í kjölfar árásar á ljósmyndara á bar í London í fyrra. Frakkinn telur að hann eigi tæpa milljón inni hjá NY Cosmos.

Ráðning Cantona á sínum tíma var liður í því að reyna að koma NY Cosmos aftur á þann stall sem félagið var áður á en það skartaði m.a. stórstjörnum á borð við Pele og Franz Beckenbauer á árum áður.

Félagið var endurvakið árið 2010 og leikur í dag í NASL-deildinni sem er næstefsta deild í Bandaríkjunum.