Ofurskært skilti fyllir mælinn hjá Kópavogsbúum

„Þetta skilti fyllir alveg mælinn,“ segir Ingibjörg V. Friðbjörnsdóttir, íbúi í Hlíðarhvammi í Kópavogi, í bréfi til heilbrigðiseftirlitsins vegna nýs auglýsingaskiltis Breiðabliks við Kópavogslæk nærri Fífunni.

Ingibjörg er einn margra Kópavogsbúa sem undanfarnar vikur hafa snúið sér til yfirvalda vegna nýja skiltisins. Segist hún vilja vekja athygli á „gríðarlegri sjónmengun“ sem fylgi skiltinu.

„Við erum ekki hrifin af þessu áreiti sem bætist við hljóðmengunina frá veginum og bílamengunina/bílasótið. Fólk kemur að tjörninni til að njóta náttúrunnar og fuglalífsins,“ skrifar Ingibjörg meðal annars.

Hrafnhildur Smith, sem býr í Fífuhvammi, kvartar í bréfi til heilbrigðiseftirlitsins undan þeirri „sjónmengun sem þetta nýja há­skerpuljósaskilti“ sé. „Það skín öskrandi skært 24 klukkustundir á dag þrátt fyrir að ég hafi heyrt að það ætti að slökkva á sér klukkan 10.30 á kvöldin.“

Þá segir Hrafnhildur að ljósaskiltið sé truflandi fyrir umferðina auk þess að vera sjónmengun á fallegu og ósnortnu svæði. „Hverjum datt í hug að setja þetta upp? Af hverju var ekki nein grenndarkynning? Umhverfismat? Er þetta yfirhöfuð leyfilegt? Viljum við virkilega vera eins og Ameríka?“ spyr hún og lýsir yfir mikilli óánægju allrar fjölskyldu sinnar.

Að sögn Sigríðar Bjargar Tómasdóttur, upplýsingafulltrúa hjá Kópavogsbæ, veitti bærinn leyfi fyrir því að breyta skiltinu í ljósaskilti síðastliðið haust. Hún segir ellefu kvörtunarbréf frá íbúum í Hvömmunum og Smárahverfi hafa borist bænum vegna skiltisins.

Einn bréfritarinn, Steen Henrik­sen sem býr í Fífuhvammi, sneri sér beint til bæjarritara og var erindi hans tekið fyrir á bæjarráðsfundi á fimmtudag. Þar var ákveðið að fela byggingarfulltrúa bæjarins að gera umsögn um málið.

Steen segist í bréfinu leggja fram kvörtun vegna skiltisins. „Ég bý nálægt skiltinu og sjónræn áhrif skæra ljóssins frá skjánum eru mjög mikil og afar angrandi,“ skrifar hann.

Eysteinn Pétur Lárusson, sem nýtekinn er við starfi framkvæmdastjóra Breiðabliks, segir umsjón og rekstur skiltisins alfarið í höndum leigutakans sem sé fyrirtækið Bill­board. Íþróttafélaginu sjálfu hafi ekki borist athugasemdir vegna málsins. Ekki náðist tal af forsvarsmönnum Billboard.

Málið var tekið fyrir á síðasta fundi Heilbrigðiseftirlits Hafnarfjarðar- og Kópavogssvæðis þar sem afgreiðslu var frestað þar sem beðið væri frekari upplýsinga.