Rausnarleg gjöf frá Sadio Mane

Stórstjarna Liverpool liðsins hefur heldur betur látið sitt af mörkum í heimalandi sínu í baráttunni við útbreiðslu kórónuveirunnar.

Sadio Mane lét af hendi 30 milljónir senegalskra franka til stjórnvalda í Senegal en það eru um sjö milljónir íslenskra króna.

Umboðsmaður Sadio Mane staðfesti fréttirnar og sagði að leikmaðurinn hafi tekið það upp hjá sér sjálfur að leggja pening í baráttuna þegar hann gerði sér grein fyrir því hvernig málin eru að þróast í Senegal.

Sadio Mane setti líka inn myndband á samfélagsmiðla sína þar sem hann skoraði á alla að taka kórónuveiruna alvarlega og virða fyrirmæli stjórnvalda.

Sadio Mane var kosinn Knattspyrnumaður Afríku í fyrra og er stærsta íþróttastjarnan Senegal.

Allar æfingar Liverpool liðsins á Melwood æfingasvæðinu hafa verið stöðvaðar en öllum leikjum liðsins til 4. apríl var frestað á föstudaginn.

Mane og aðrir leikmenn hafa æft sjálfir í einrúmi eftir að hafa fengið fyrirmæli frá knattspyrnustjóranum Jürgen Klopp.