Innlent

Geta séð fossinn Dynjanda í fyrsta sinn í klakaböndum

Kristján Már Unnarsson skrifar
Bílarnir streymdu á bílastæðið við Dynjanda í gær. Margir voru að sjá fossinn í fyrsta sinn á þessum árstíma.
Bílarnir streymdu á bílastæðið við Dynjanda í gær. Margir voru að sjá fossinn í fyrsta sinn á þessum árstíma. Mynd/Eggert Stefánsson

Ísfirðingar og aðrir íbúar á norðanverðum Vestfjörðum, sem óku um Dýrafjarðargöng í gær, uppgötvuðu margir óvænt nýjan möguleika sem jarðgöngin skapa. Í fyrsta sinn verður hægt að aka um þjóðvegakerfið að fossinum Dynjanda um hávetur auk þess sem leiðin hefur styst verulega.

Fossinn er í botni Arnarfjarðar, á milli Hrafnseyrarheiðar og Dynjandisheiðar, og því hefur landleiðin að Dynjanda lokast þegar heiðarnar verða ófærar. Í fyrravetur voru heiðarnar til dæmis lokaðar samfellt í hartnær fimm mánuði, frá miðjum desember og fram til 8. maí í vor.

„Við vorum þrír í bílnum og ætluðum að snúa við hjá Mjólkárvirkjun þegar okkur datt í hug að keyra aðeins lengra og kíkja á fossinn Dynjanda,“ segir Eggert Stefánsson, rafeindavirki frá Þingeyri, sem búsettur er á Ísafirði, en hann tók meðfylgjandi myndir.

Fossinn Dynjandi í Arnarfirði í gær.Mynd/Eggert Stefánsson

„Margir sneru við hjá Mjólká en það voru líka margir sem óku áfram að Dynjanda. Ég giska á að margir hafi verið að sjá Dynjanda í fyrsta sinn á þessum árstíma,“ segir Eggert, sem reyndar vegna starfa sinnar hefur þurft að fara í Arnarfjörð að vetrarlagi og komið að Dynjanda í klakaböndum.

„Ég er viss um að margir eigi eftir að nýta sér þetta, að skreppa að Dynjanda og sjá fossinn í klakaböndum þegar fer að frysta. Það er dálítið glæsilegt.“

Í Dynjandisvogi í gær. Fossinn og umhverfi hans eru friðlýst.Mynd/Eggert Stefánsson

Vegalengdin milli Ísafjarðar og Dynjanda um Hrafnseyrarheiði er 87 kílómetrar en styttist niður í tæpa 60 kílómetra með Dýrafjarðargöngum. Næsta haust verður leiðin á milli auk þess nánast öll orðin malbikuð þegar lokið verður endurnýjun á 5,7 kílómetra kafla í Arnarfirði, um Meðalnes nyrst við Dynjandisvog, sem Íslenskir aðalverktakar vinna að.

Vegafarendur sem koma sunnan að um Dynjandisheiði geta einnig vænst þess að sjá Dynjanda í klakaböndum í vetur. Vegagerðin hefur ákveðið að reyna að halda heiðinni opinni á virkum dögum í vetur með fimm snjómokstursdögum í hverri viku, að sögn Guðmundar Björgvinssonar, yfirverkstjóra á Ísafirði. Sá kafli verður einnig orðinn betri innan árs þegar Íslenskir aðalverktakar ljúka gerð nýs 4,3 kílómetra kafla ofan Flókalundar, um Þverdalsá og Pennusneiðing.


Tengdar fréttir

Flautuðu af gleði þegar þeir prófuðu göngin í fyrsta sinn

Vestfirðingar flautuðu úr bílum sínum af gleði þegar Sigurður Ingi Jóhannsson samgönguráðherra gaf fyrirmæli um að lyfta skyldi slánni við gangamunna Dýrafjarðarganga. Þegar þeir svo óku í gegn flautuðu þeir ennþá meira.

„Krakkar! Þið megið fara af stað,“ sagði ráðherra og slánni var lyft

„Krakkar! Þið megið fara af stað," sagði samgönguráðherra eftir að hafa gefið fyrirmæli um að Dýrafjarðargöng skyldu opnuð umferð. Löng bílalest beið beggja vegna og áætluðu Vegagerðarmenn á vettvangi að milli 250 og 260 bílar hefðu ekið í gegn á eftir rútunni.

Dýrafjarðargöng opin fyrir umferð

Í dag klukkan 14 verða Dýrafjarðargöng opnuð. Vegna samkomutakmarkana verður opnunin með óhefðbundnum hætti, en henni verður streymt beint hér á Vísi.

Fyrstu kaflarnir kláraðir á einu ári á Dynjandisheiði

Vegagerðin hefur boðið út tvo fyrstu kaflana í endurnýjun vegarins um Dynjandisheiði, samtals um tíu kílómetra langa. Góð sátt virðist ríkja um þessa áfanga og er ekki vitað til þess að neinn hafi lýst andstöðu við þær veglínur sem núna eru boðnar út.

Vegagerðin hafnar lægsta tilboðinu í Dynjandisheiði

Vegagerðin hefur hafnað lægsta tilboði í endurbyggingu þjóðvegarins yfir Dynjandisheiði vegna reynsluleysis verktakans af stórverkum og þess í stað ákveðið að semja við þann verktaka sem átti næstlægsta boð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×